Qaraǵandyda zańsyz oıyn bıznesin uıymdastyrǵan qylmystyq top qolǵa tústi

NUR-SULTAN. QazAqparat - QR Qarjylyq monıtorıng agenttiginiń Qaraǵandy oblysy boıynsha Ekonomıkalyq tergeý departamentiniń qyzmetkerleri «STOP-oıyn» jedel-aldyn alý is-sharalaryn júrgizý nátıjesinde Qaraǵandy aýmaǵynda zańsyz oıyn bıznesin uıymdastyrǵan, quramynda 5 adamy bar qylmystyq toptyń qyzmetin áshkereledi.

Júrgizilgen arnaıy jedel-izdestirý is-sharalary jáne jasyryn tergeý áreketteriniń nátıjesinde Qaraǵandy qalasyndaǵy qonaq úı keshenderiniń birinde jumys istegen astyrtyn poker klýbynyń qyzmetiniń joly kesildi, dep habarlaıdy QazAqparat QR Qarjylyq monıtorıng agenttiginiń baspasóz qyzmetine silteme jasap.

Oqıǵa ornynan 2 mln. teńge jáne 1 myń AQSh dollary somasyndaǵy aqsha, uıaly telefondar, oıyn kartalarynyń qoraby, fıshkalar men poker oınaýǵa arnalǵan ústel tárkilenip alyndy.

«Qylmystyq topty uıymdastyrýshylarǵa qatysty (2 adam, bireýi osyǵan uqsas qylmysy úshin buryn qylmystyq jaýapqa tartylǵan) «qamaýda ustaý» túrindegi bultartpaý sharasy tańdaldy. Atalǵan faktiler boıynsha QR QK 307-baby 2-b., 262-baby 1-b. jáne 2-b. boıynsha qylmystyq is tirkeldi. Tergeý amaldary júrgizilýde»,-delingen habarlamada.