Qaraǵandyda zańsyz qoqys tókkenderdi áshkereleıtin top jumys isteıdi
ASTANA. QazAqparat - Qaraǵandy oblysynda 2018 jyly 350 aýla, 8 saıabaq jáne 81 gúl baqtary abattandyrylady. Bul maqsattarǵa 5 mlrd teńgeden astam qarajat bólingen, dep habarlaıdy ákimniń baspasóz qyzmeti.
Bıylǵy jyly qalypqa keltiriletin saıabaqtar qatarynda - Qaraǵandy qalasynyń Ortalyq mádenıet jáne demalys saıabaǵy men Jezqazǵandaǵy «Jastar» saıabaǵy bar.
«Abattandyrý boıynsha bul sharalar bizdiń qalalar men aýdandardyń deńgeıin kóteredi. Degenmen, oryndalatyn jumystardyń sapasyna kóńil aýdarǵan jón. Oblys ákimi blogyna bizdiń azamattardan sapasyz jumysqa qatysty shaǵymder kelip túsip jatady», - dedi Qaraǵandy oblysy ákiminiń orynbasary Anatolıı Shkarýpa.
Ol sonymen qatar oblysta sanıtarlyq tazartý boıynsha eki aılyq bastalǵanyna kóńil aýdardy. Alaıda, qalalar men aýdandarda áli de zańsyz qoqys úıindileri qalyp otyr. Ásirese, bul problema jeke sektorlar úshin ózekti. Oblys ákiminiń orynbasary polıtsııa qyzmetkerlerin abattandyrý normalarynyń saqtalýyn jiti baqylaýǵa alyp, qajet bolǵan jaǵdaıda ereje buzǵandarǵa aıyppul taǵýǵa shaqyrdy.
«Qaraǵandyda bir apta boıy zańsyz qoqys úıindilerin anyqtaýmen aınalysqan arnaıy top jumys istedi. Ol jumystardyń nátıjesi Qaraǵandy qalasynyń ákimine meniń berip jibergen albomǵa engizildi. Barlyq zańsyz qoqys úıindilerin joıyńyzdar. Bir aptadan soń sol núktelerdi aralap shyǵamyn da, barlyǵyn qadaǵalap qaıtamyn», - dedi Qaraǵandy oblysynyń ákimi Erlan Qoshanov.
Qazir zańsyz qoqys úıindileriniń tizimi jazylǵan osy sekildi albomdar oblysymyzdyń basqa da qalalary men aýdandarynda ázirlenip jatyr. Olar aýmaqtaǵy sanıtarlyq tazalyq boıynsha oblystyq eki aılyq aıaqtalǵansha, 21-shi maýsymǵa deıin joıylýy tıis.
