Qaraǵandyda zamanǵa saı jabdyqtalǵan 24 jańa avtobýs jolǵa shyǵady
QARAǴANDY. QazAqparat - Búgin Qaraǵandy qalasy boıynsha baǵyttarǵa Sarandaǵy QazTehna zaýytynda qurastyrylǵan 24 jańa avtobýs shyqty. Bul týraly búgin óziniń Facebook paraqshasynda Qaraǵandy oblysynyń ákimi Jeńis Qasymbek málim etti, dep habarlaıdy QazAqparat.
«Ónerkásipti damytý qory» AQ jeńildetilgen lızıngtik baǵdarlamasynyń jáne oblys ákimdiginiń qoldaýynyń arqasynda 1-Taksokombınat jańa tehnıka satyp aldy. Birinshi kezekte avtobýstar №01 jáne №30 baǵyttarǵa jiberiledi. Sodan keıin №№7, 013, 28, 31 baǵyttaryna shyǵarylady.
Syıymdylyǵy 50 jolaýshyny quraıtyn avtobýstar barlyq zamanaýı talaptarǵa jáne Evro-5 ekologııalyq sanatyna sáıkes keledi. Avtobýstar arbadaǵy múgedekterge arnalǵan pandýstarmen jáne alańshalarmen, balaly jolaýshylarǵa arnalǵan oryndarmen, sondaı-aq kondıtsıonerlermen jabdyqtalǵan»,-deıdi oblys ákimi.
Onyń sózinshe, maýsym aıynda «Reıs» JM tasymaldaýshysyna 16 jańa avtobýs jáne Saran qalasynyń avtoparkine 15 avtobýs jetkiziledi dep kútilýde. Sondaı-aq Jezqazǵanǵa 30 jańa avtobýs jetkiziledi. Buǵan qosa, Temirtaýǵa Semeıden 20 avtobýs ákelindi. Aldaǵy ýaqytta taǵy 55 avtobýsty jetkizý josparlanýda.
«Aldaǵy 2-3 jyl ishinde oblystyń barlyq iri qalalarynda qoǵamdyq kólikter barynsha jańartylady. Sonymen qatar, aýdanaralyq jáne oblysishilik reısterdi avtobýstarmen jabdyqtaıtyn bolamyz»,-dedi Jeńis Qasymbek.
