Qaraǵandyda volonterler qarttar men kópbalaly otbasylarǵa azyq -túlik jetkizýde
Karantın kezinde METRO CASH&CARRY jáne jergilikti demeýshilerdiń qoldaýymen Qazaqstannyń Qyzyl Jarty Aı Qaraǵandy oblystyq fılıaly 127 adamǵa kómek qolyn sozdy. Ótken aptada 153 500 teńgege 29 azyq-túlik sebeti jınaldy. Eriktiler bul jınaqtardy jalǵyz basty zeınetkerlerge, jalǵyz basty analarǵa, kóp balaly otbasylarǵa jáne múmkindigi shekteýli adamdarǵa tasymaldaıdy. Sondaı-aq qart adamdarǵa dári-dármek jetkizý boıynsha emhanalarmen jumys uıymdastyryldy.
Uıymnyń habarlaýynsha, barlyq jumyldyrylǵan eriktiler kómekke muqtaj adamdarǵa birinshi kezekte qajetti taýarlardy jetkizý boıynsha volonterlerge arnalǵan nusqamadan ótken.
«Bizdiń mıssııamyz – qıyn jaǵdaıǵa tap bolǵan adamdarǵa gýmanıtarlyq kómek jáne áleýmettik qoldaý kórsetý. Qyzmetkerler men eriktiler zardap shekkenderdiń arasynda úlestiretin gýmanıtarlyq kómek - uıymdar men jeke tulǵalardyń qaıyrymdylyǵy esebinen satyp alynǵan birinshi qajettilik zattary», - deıdi Qazaqstannyń Qyzyl Jarty Aı Qaraǵandy oblystyq fılıalynyń dırektory Tatıana Abramova.
Qyzyl Jarty Aı oblystyq fılıalynda 8-700-971-75-74 jedel baılanys jumys isteıdi. Munda koronavırýstyń taralýynyń aldyn alý boıynsha keńes alýǵa, tótenshe jaǵdaı týraly jáne bizdiń oblystaǵy karantın týraly bilýge bolady.
Al qaraǵandylyq «Ana-Mama» qaıyrymdylyq qory karantın jáne tótenshe jaǵdaı kezinde muqtajdarǵa, qart adamdarǵa, sondaı-aq jedel járdem qyzmetine kómektesedi. Qor qyzmetkerleri azyq-túlik jıyntyǵyn jáne ystyq túski as tasymaldaıdy.
Qordyń eriktileri qart adamdarǵa, jedel járdem dárigerlerine ystyq taǵamdar daıyndaıdy. Qaraǵandy óńiriniń eldi mekenderine azyq-túlik jıyntyǵy da jetkiziledi. Karantın bastalǵannan beri «Ana-Mama» qory turmysy tómen otbasylarǵa 650-den astam azyq-túlik sebetin jetkizip, 550-den astam túski as daıyndady.
Qor eriktiler men demeýshilerge kómek kórsetkeni úshin alǵys bildirip, yntymaqtastyqqa shaqyrady. Qazirgi qıyn kezeńde kómekke muqtaj adamdarǵa qol ushyn sozǵysy keletinder 8-702-637-80-20 telefony boıynsha habarlasa alady.
