Qaraǵandyda Vıktor Tsoıǵa memorıaldyq eskertkish ornatyldy
QARAǴANDY. QazAqparat - Qaraǵandy qalasynda 38 jasynda dúnıeden ozǵan rok-juldyzy Vıktor Tsoıdyń qurmetine memorıaldyq eskertkish ornatyldy, dep habarlaıdy QazAqparat tilshisi.
Olımpııskıı kóshesinde ashylǵan saıajol, Vıktor Tsoıǵa arnalǵan memorıal jáne sporttyq alań - bul «Er Nur & Nıka» qazaq-koreı dostyǵy qoǵamdyq qorynyń qaraǵandylyqtarǵa tartýy.
Atalmysh qor ókilderi men Qaraǵandy ákimdigi Tsoıǵa arnalǵan eskertkishtiń úlgi-nobaıyna baıqaý jarııalaǵan bolatyn. Qazylar alqasy sáýletshi Dmıtrıı Bykovty jeńimpaz dep tanyp, oǵan 500 myń teńge kóleminde syıaqyny tabys etti.
Qor ókilderiniń shaqyrýymen merekege kelgen Vıktor Tsoıdyń ákesi ulynyń ónerine qurmet bildirgenderi úshin alǵys aıtty.
«Ulym úshin maqtanamyn. Ulym Vıktorǵa kórsetip jatqan úlken syı-qurmetterińiz úshin barlyq qaraǵandylyqtar men uıymdastyrýshylarǵa shyn nıetpen alǵysymdy bildiremin», - dedi Robert Tsoı.
Rok-juldyzyna ornatylǵan monýmenttiń janynda saıajol men sporttyq alań jasalǵan. Mereke Kenshilerdiń mádenıet saraıynda «Solnechnye dnı» tobynyń (Máskeý-Ekaterınbýrg) oryndaýyndaǵy «Kıno» tobynyń barlyq ánderi» atty kontsertpen jalǵasty.
Vıktor Tsoı 1962 jyldyń 21 maýsymy kúni Lenıngradta dúnıege kelgen. Rok-mýzykant, ánderdiń avtory jáne sýretshi. «Kıno» rok-tobynyń negizin qalaýshy jáne solısi.
Ol Robert Maksımovıch Tsoı men Valentına Vasılevnanyń jalǵyz balasy bolǵan.
1990 jyldyń 15 tamyzynda Vıktor Tsoı jol apatynan qaza boldy. Qaıǵyly oqıǵa Latvııada «Sloka-Talsı» tasjolynyń 35-inshi shaqyrymynda oryn aldy. Jol apatynyń anaǵurlym shyndyqqa janasatyn resmı nusqasyna sáıkes, Tsoı uıyqtap ketken jáne onyń basqarýyndaǵy «Moskvıch-2141» kóligi qarsy jolǵa shyǵyp ketip, avtobýspen soqtyǵysqan.
