Qaraǵandyda «Valıýt-Tranzıt banktiń» taratý komıssııasy burynǵy bankır Belıaevtyń úıin tárkiledi
QARAǴANDY. 13 tamyz. QazAqparat - Qaraǵandyda «Valıýt-Tanzıt bank» AQ taratý komıssııasy burynǵy bankır Aıtbaqy Belıalovtyń (Andreı Belıaev dep tanylǵan) otbasy turyp kelgen úıdi tárkiledi.
Bul týraly salymshylarmen ótken jıyn barysynda «Valıýt-Tranzıt bank» AQ taratý komıssııasynyń tóraǵasy Jandos Amanbekov habarlady.
«Bizdiń Qaraǵandydaǵy Belıavtyń úıin sotpen qaıyryp alýǵa múmkindigimiz týdy. Qazir osy nysanǵa quqyǵymyz jónindegi tirkeý jumystary júrgizilip jatyr», - dedi J. Amanbekov.
Belgili bolǵandaı, úıdiń ıeleri birneshe ret aýysqan. Qujattarǵa sáıkes, 2002 jyldyń qarashasynda burynǵy balabaqsha ǵımaratyn «Valıýt-Tranzıtpen» qosylyp, «Novyı svet» JShS alǵan. Sol jyldyń 1 jeltoqsanynda ǵımarat «Valentına jáne K» kommandıttik seriktestigine berilip, jarty aıdan keıin ol úıdiń ıesine eks-bankırdiń áıeli Álııa Álkeeva aınalǵan. 2006-2009 jyldar aralyǵynda bul úı syıǵa berý arqyly bir qyzynan ekinshisine ótip otyrǵan. Al 2010 jyly úıdi Belıaevtardyń týysy satyp alady.
«Biz jaqynda úıdi qaraý úshin onyń ishine kirmek boldyq, alaıda kúzetshiler ótkizbedi. Sol sebepti biz burynǵy ıesin kúshtep shyǵarý úshin sotqa shaǵymdandyq», - dep qosty J. Amanbekov.
Eske sala ketsek, Valıýt-Tranzıt bankiniń burynǵy basshysy A. Belıaeov qarjylyq qylmysy úshin 3,5 jylǵa bas bostandyǵynan aıyrylǵan bolatyn. Jazasyn óteý merzimi aıaqtalýǵa jaqyndaǵanada oǵan qatysty jańa aıyptaýlar taǵyldy. Sot ony taǵy on jylǵa bas bostandyǵynan aıyryp, dúnıe-múlkin tárkileýge sheshim shyǵardy. Іsti bolǵan A. Belıaev 2013 jyldyń 11 aqpanynda ınfarkt bolyp, kóz jumdy.
«Valıýt-Tranzıt bankti» taratý protsesi 2007 jyldyń tamyzynan beri júrgizilip keledi. Banktiń jalpy kredıttik qaryzy 47 mlrd. teńgeni quraǵan. Sonyń ishinde salymshylarǵa 8 mlrd. teńgege jýyq aqshany qaıtaryp berý kerek. Taratý komıssııasy depozıtterdi kepildendirý qoryna 14 mlrd. teńge qaryzdy tólep jatyr.
