Qaraǵandyda úzdik medıtsına qyzmetkerleri marapattaldy
QARAǴANDY. QazAqparat - Qaraǵandyda úzdik dárigerler oblys ákiminiń syılyǵymen marapattaldy. Medıtsına qyzmetkerleri óz kásibı merekesin qıyn kezeńde qarsy alýda. Dál osy kúrdeli ýaqytta olar óz mamandyǵyna jáne Gıppokrat antyna adaldyǵyn dáleldep otyr, dep habarlaıdy QazAqparat tilshisi.
Marapattalatynyn laýreattardyń bir bóligi jumys ornynda júrip bildi. Medıtsına qyzmetkerlerine qurmet kórsetý jańa formatta ótti. Baıqaý jeńimpazdary naǵyz telejuldyz boldy. Olardyń esimin jergilikti telearnalardyń praım-taım efırinde atap ótti. Ol úshin marapattaý rásiminiń arnaıy telejobasy daıyndaldy.
«Men búgin sizderdi, bizdiń qymbatty dárigerlerimizdi, feldsherler men medbıkelerdi quttyqtap otyrǵanyma qýanyshtymyn. Árqaısyńyzdyń qolyńyzdy alyp, alǵysymdy aıtqym keledi. Biraq, kórip otyrǵanymyzdaı, ýaqyt talaptary men sizderdiń talaptaryńyzdy saqtaı otyryp, biz sizderdi beınebaılanys arqyly quttyqtaýǵa májbúrmiz. Jalpyǵa ortaq kúsh-jigerimizdiń arqasynda biz jaqynda burynǵy ómirimizge qaıta oralamyz dep úmittenemin», - dedi beınequttyqtaýda Qaraǵandy oblysynyń ákimi Jeńis Qasymbek.
Óńir basshysy atap ótkendeı, oblystyń 18 myńnan astam medıtsına qyzmetkeri aldyńǵy qatarda qyzmet etýde. COVID-19-ben kúreske 3 500 maman tartyldy. Olar týystary men jaqyndaryn uzaq ýaqyt kórmeıdi jáne halyq densaýlyǵyn qorǵaý jáne ómirin qutqarý úshin barlyq múmkindikterdi jasaýda.
«Biz sizderdiń jumysyńyzdy barynsha jeńildetýge tyrysamyz. Sońǵy jyldary oblys medıtsınasy alǵa jyljydy. Qaraǵandy eń myqty medıtsına kadrlarynyń ustahanasy boldy jáne solaı bolyp qala beredi», - dep sendirdi Jeńis Qasymbek.
Oblys ákimi densaýlyq saqtaý nysandaryn jańǵyrtý jáne jańa medıtsınalyq mekemelerdiń qurylysy týraly aıtty.
Óńir basshysy dárigerlerge myqty densaýlyq, amandyq jáne úırenshikti ómir yrǵaǵyna tezirek oralýyn tiledi.
7 nomınatsııa boıynsha jeńimpazdar 500 myń teńge kóleminde syıaqy aldy.
«Kásibine adaldyǵy úshin» arnaıy syılyǵy men mıllıon teńge sertıfıkatynyń ıegerin Jeńis Qasymbek teleefırde jarııalady. Bul marapatqa Densaýlyq saqtaý ardageri, dáriger-kardıolog Elýbaı Ábjanov ıe boldy.
1981 jyly ol elimizdegi alǵashqy oblystyq kardıologııalyq dıspanserdi basqardy. Onyń basshylyǵymen oblystyń kardıologııalyq qyzmeti jetildirildi. Joǵary sanatty kardıologtyń marapattarynyń ishinde KSRO HDH kúmis medali bar.
Jasy ulǵaıǵanyna qaramastan, densaýlyq saqtaý ardageri qazir de sapta, densaýlyq saqtaý qyzmetinde qalyp otyr. Elýbaı Ábjanov Maqajanov atyndaǵy aýrýhanada eńbek etip, Qaraǵandy medıtsına ýnıversıtetinde ǵylymı jumystar júrgizýde.
Bıyl oblys ákimi syılyǵynyń laýreaty atanǵandar:
«Úzdik terapevt» nomınatsııasynda - Sandýǵash Asanova, H. J. Maqajanov atyndaǵy kópsalaly aýrýhananyń terapevtik bóliminiń meńgerýshisi;
«Úzdik jalpy tájirıbe dárigeri» - Valentına Gýrr, Buqar jyraý aýdany Samarqand aýylynyń dárigerlik ambýlatorııasynyń jalpy tájirıbe dárigeri;
«Úzdik orta medıtsına qyzmetkeri» - Sáýle Joraeva, Temirtaý ortalyq aýrýhanasynyń jan saqtaý jáne qarqyndy terapııa bólimshesiniń aǵa medbıkesi;
«Úzdik akýsher-gınekolog» - Lıdııa Glazýn, Shahtınsk ortalyq aýrýhanasynyń akýsherlik-gınekologııalyq bóliminiń meńgerýshisi;
«Úzdik pedıatr» - Qarlyǵash Sharııazdanova, dáriger-pedıatr, oblystyq balalar klınıkalyq aýrýhanasy dırektorynyń medıtsınalyq qyzmet sapasyn baqylaý jónindegi orynbasary;
«Úzdik hırýrg» - Erkebulan Tóleýbaev, oblystyq klınıkalyq aýrýhananyń hırýrgııa bóliminiń meńgerýshisi;
«Densaýlyq saqtaýdyń úzdik uıymdastyrýshysy» - Baıan Danııarova, oblystyq klınıkalyq aýrýhana dırektorynyń strategııalyq damý jónindegi orynbasary.
Qazaqstanda medıtsına qyzmetkerleriniń kúni jyl saıyn maýsym aıynyń úshinshi jeksenbisinde atap ótiledi.
Qaraǵandy oblysy ákiminiń densaýlyq saqtaý qyzmetkerlerine syılyǵy 2006 jyly bekitildi.
