Qaraǵandyda úzdik mádenıet jáne óner qyzmetkerleri marapattaldy
QARAǴANDY. QazAqparat - Búgin Qaraǵandyda úzdik mádenıet jáne óner qyzmetkerleri marapattaldy. Saltanatty shara K. Stanıslavskıı atyndaǵy orys drama teatrynyń sahnasynda ótti, dep habarlaıdy óńir basshysynyń resmı saıty.
Oblys ákiminiń syıaqysy 21 nomınatsııa boıynsha tabystaldy.
«Bul salada tek óz isine shynaıy ǵashyq adamdar ǵana jumys jasaı alady.Sizderdiń ǵajaıypty, meıirimdilikti kóre alýlaryńyzdyń arqasynda biz rýhanı damımyz»,- dedi Qaraǵandy oblysynyń ákimi Erlan Qoshanov saltanatty shara barysyndaǵy quttyqtaý sózinde. - Qaraǵandy oblysy talantty adamdarǵa baı jáne biz olarǵa jumys jasaý úshin qajettiliktiń barlyǵyn jasaýymyz kerek. Bıyl biz mádenıet nysandaryn jóndeý jumystarynyń bıýdjetin úsh esege kóbeıte aldyq,onyń ishinde basty nazar aýyldyq jerlerge bólindi. Qaraǵandyda jańa kontsert zalyn jobalaý jumystary bastaldy. Bıylǵy jyly qalamyzdyń mýzyka mektepteri úshin 120 mln teńgege jańa aspaptar satyp alyndy. Kezeń boıynsha biz mektepter jabdyqtaryn jańartamyz. Alǵash ret oblystyq bıýdjet esebinen 50-den asa oqýshy Kann, Rım, Praga qalalarynda ótken saıystarǵa baryp qaıtty. Olardyń barlyǵy marapattarmen oraldy, bul bizdiń ustazdarymyzdyń kásibıligin kórsetedi. Talantty ártisterdiń jańa býyny ósip keledi».
Aımaq basshysy mádenıet jáne óner qyzmetkerlerine alǵys bildirip, olardy kásibı merekelerimen quttyqtady.
Bıyl 23 adam oblys ákimi syıaqysynyń ıegerleri atandy. Úzdik mádenıet jáne óner qyzmetkerleri 500 myń teńgeden aldy.
Bir mıllıon teńge kólemindegi «Mamandyǵyna adaldyǵy úshin» arnaıy syıaqysyn T.Qalmaǵanbetov atyndaǵy Jezqazǵan fılarmonııasynyń ártisi Ǵalym Muhamedın men Q.Baıjanov atyndaǵy KB «Araı» ansambliniń aspapshy solısi Aleksandr Sevostıanov ıelendi.
