Qaraǵandyda úzdik densaýlyq saqtaý qyzmetkerleri marapattaldy
QARAǴANDY. QazAqparat - Qaraǵandyda kásibı mereke qarsańynda Densaýlyq saqtaý salasynyń úzdik qyzmetkerlerine qurmet kórsetildi. Olarǵa Qaraǵandy oblysy ákiminiń syılyǵy tabys etildi, dep xabarlaıdy QazAqparat tilshisi.
Saltanatty rásim K. Stanıslavskıı atyndaǵy teatr sahnasynda ótti.
«Men búgin osy zalda adamdardyń densaýlyǵyna qamqorlyq jasaýdy tańdaǵan abzal jandardyń arasynda turǵanyma óte qýanyshtymyn. Eń shynaıy quttyqtaýlar men tilekterdi búgin biz densaýlyq saqtaý ardagerlerine de aıtqymyz keledi. Sizder biregeı Qaraǵandy mektebin qurdyńyzdar. Sizderdiń eńbekterińizge, tájirıbelerińizge baǵa jetpeıdi. Medıtsına ýnıversıteti men kolledj qyzmetkerlerine erekshe alǵys aıtamyz. Sizder barlyq bilimderińizben shákirtterińizben, bolashaq dárigerlermen, medbıkelermen tájirıbe bólisip kelesizder. Sizderdiń eńbekterińiz ben qamqorlyqtaryńyzdy xalyq uzaq jyldar boıy este saqtasyn degim keledi», - dedi Qaraǵandy oblysy ákiminiń m.a. Erlan Qoshanov merekelik rásimdi asha otyryp. 
Ol sondaı-aq densaýlyq saqtaý júıesindegi problemalar birtindep sheshilip kele jatqanyn atap ótti. Aýrýhanalar zamanaýı jabdyqtarmen qamtamasyz etilýde. Densaýlyq saqtaý mekemelerinde ozyq aqparattyq tehnologııalar engizilip jatyr. Al oblystyń qalalary men aýdandaryna jumys isteýge kelgen jas mamandar turǵyn úımen qamtamasyz etilýde.
Birneshe nomınatsııada qaraǵandylyq medıkterge oblys ákiminiń syılyǵyn olardyń sheteldik áriptesteri tabys etti.
Olardyń biri - kardıohırýrg, medıtsına ǵylymdarynyń doktory Loaıs Levano Ýgo Karlos-Perý týmasy, qazir Máskeýde jumys isteıtin anestezıolog-reanımatologtarǵa, neonatologtarǵa jáne pedıatrlarǵa arnalǵan semınar-trenıng ótkizý úshin Qaraǵandyǵa kelgen. Stanıslavskıı teatrynyń sahnasynda ol «Úzdik pedıatr», «Úzdik akýsher-gınekolog» jáne «Úzdik hırýrg» nomınatsııalary boıynsha syılyqtardy tabys etti.
Laýreattardy quttyqtaýǵa medıtsına ǵylymdarynyń doktory, №2 Qaraǵandy aýrýhanasynda jumys isteıtin polshalyq dáriger-kardıohırýrg Voıtseh Ejı qosyldy. Sondaı-aq Garvala medıtsınalyq ýnıversıtetiniń professory (Úndistan) Renna Tıvarı boldy. Ol 2018 jyldan bastap Qaraǵandy medıtsına ýnıversıtetinde sabaq beredi.
Bıyl oblys ákimi syılyǵynyń laýreaty atanǵandar: «Úzdik terapevt» nomınatsııasynda - dáriger kardıolog, «Júrek» JShS kardıologııalyq bóliminiń meńgerýshisi Baqytbek Aıtenov; «Úzdik jalpy tájirıbe dárigeri» - Abaı qalasynyń ortalyq aýrýhanasynyń jalpy tájirıbe dárigeri Galına Afanaseva; «Úzdik orta medıtsına qyzmetkeri» - Qaraǵandy qalasynyń №1 emhanasynyń medbıkesi Gúlden Ábenova; «Úzdik akýsher-gınekolog» - dáriger akýsher-gınekolog, oblystyq perınataldyq ortalyq dırektorynyń emdeý isi jónindegi orynbasary Aleksandra Motorgına; «Úzdik pedıatr» - dáriger pedıatr, Temirtaý qalasynyń kópbeıindi ana men bala ortalyǵynyń balalar blogynyń jansaqtaý jáne qarqyndy terapııa bóliminiń meńgerýshisi Sergeı Aleksandrov; «Úzdik hırýrg» - Oblystyq onkologııalyq dıspanseriniń Torakaldyq bóliminiń meńgerýshisi Erǵalı Sháýenov; «Densaýlyq saqtaýdyń úzdik uıymdastyrýshysy» - Oblystyq psıhonevrologııalyq dıspanseri dırektory Qaırat Ábdirahmanov.
Laýreattardyń árqaısysy 500 myń teńgeden aldy.
Qaraǵandy oblysy ákiminiń «Mamandyqqa adaldyǵy úshin» nomınatsııasy boıynsha bir mıllıon teńge kólemindegi arnaıy syılyǵy «Aqtoǵaı aýdanynyń ortalyq aýdandyq aýrýhanasy» KMK «Saryterek» DA jalpy tájirıbe dárigeri Amantaı Ámirqulovqa berildi.
Terapevt, jalpy praktıka dárigeri Amantaı Ámirqulov emdelýshilerdi 52 jyl boıy emdeıdi. Osy jyldar boıy ol Aqtoǵaı aýdandyq aýrýhanasynda eńbek etken. KSRO Densaýlyq saqtaý úzdigi, «Qurmet» ordeniniń ıegeri jáne Aqtoǵaı aýdanynyń Qurmetti azamaty. Amantaı Ámirqulovtyń eki uly ákesiniń isin jalǵastyryp, dáriger bolǵan. Úlken uly hırýrg, kishisi - terapevt.
Mereke kontsertpen jalǵasty. Qaraǵandy medıkterine belgili estrada jáne opera ánshileri: QR eńbek sińirgen ártisi, QR Memlekettik syılyǵynyń laýreaty Maıra Muhamedqyzy, reseılik «Golos. Detı» jobasynyń jeńimpazy Erjan Maksım, Moldovadan kelgen fleıtashy Igor Podgoreaný, Astana opera teatrynyń solısi Meır Baınesh, I' m a singer Kazakhstan teleshoý jeńimpazy Roman Kım jáne basqa da ártister óner kórsetti.
Qazaqstanda medıtsına qyzmetkerleriniń kúni jyl saıyn maýsymnyń úshinshi jeksenbisinde atap ótiledi. Qaraǵandy oblysy ákiminiń Densaýlyq saqtaý qyzmetkerlerine syılyǵy 2006 jyly taǵaıyndalǵan bolatyn.
