Qaraǵandyda ustalǵan qylmystyq toptan kıiktiń 700-den astam múıizi tárkilendi

NUR-SULTAN. QazAqparat – Qaraǵandy oblystyq polıtsııa departamentiniń qyzmetkerleri Ulytaý oblysy Jańaarqa aýdanyna qarasty Qyzyljar eldi mekeninde sońǵy birneshe jyl ishinde atalǵan eki oblys aýmaǵynda Qyzyl kitapqa engen kıikterdi zańsyz atýmen aınalysqan qylmystyq toptyń múshelerin ustady, dep habarlaıdy QazAqparat Polisia.kz saıtyna silteme jasap.

Qylmystyq top músheleri merzimdi túrde kıikterdi atyp, múıizderin Qytaıǵa jóneltý maqsatynda ońtústik óńirge satyp otyrǵan. Olar qylmystyq jolmen alynǵan kıik múıiziniń bir kelisin 80-100 myń teńge aralyǵynda satqan.

«Qazirgi ýaqytta polıtsııa qyzmetkerleri alty tintý jumystaryn júrgizip, qylmystyq toptyń úsh múshesi (34 pen 46 jas aralyǵynda) ustalyp, úsheýine izdeý jarııalandy. 150 keli, ıaǵnı 732 dana kıik múıizi tárkilendi. Sondaı-aq, kúdiktilerden tarazy, pyshaq sýyq qarýy, tirkelmegen qarý jáne avto-mototehnıka tárkilenip alyndy», - dep habarlady Qaraǵandy oblystyq polıtsııa departamenti bastyǵynyń orynbasary Ábil Ábildın.

Atalǵan fakti boıynsha QR Qylmystyq kodeksiniń 339-1-babyna (Sırek kezdesetin jáne quryp ketý qaýpi tóngen janýarlardyń, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes qylmystyq is qozǵaldy. Atalǵan baptyń sanktsııasy múlkin tárkileı otyryp, 3 jyldan 5 jylǵa deıin bas bostandyǵynan aıyrýdy kózdeıdi. Tergeý áreketterimen Qaraǵandy oblystyq polıtsııa departamenti tergeý basqarmasynyń tergeýshileri aınalysyp jatyr.

Bıyl aqpan aıynda Qaraǵandy oblysy polıtsııa departamentiniń qyzmetkerleri atalǵan aýdannan 844 kıik múıizin tárkilegen bolatyn.