Qaraǵandyda úsh jasar bala 4-qabattan qulap ketti
QARAǴANDY. QazAqparat - Búgin Qaraǵandyda taǵy bir bala terezeden qulap ketti. 2015 jyly týǵan bala 4-qabattaǵy páterdiń terezesinen dúkenniń shatyryna qulap túsken, dep habarlaıdy QazAqparat Qaraǵandy oblystyq TJD baspasóz qyzmetine silteme jasap.
Qaraǵandy oblystyq tótenshe jaǵdaılar departamenti jedel-qutqarý jasaǵynyń qutqarýshylary balany dúken shatyrynan túsirip, jedel járdemge tapsyrdy.
Bıyl balalardyń terezeden qulaýyna osymen 14-shi oqıǵa tirkelip otyr. Bunyń basty sebebi - ata-ananyń balasyn qaraýsyz qaldyrýy.
Eske sala keteıik, oblysta ótken aptanyń ózinde eki bala bıik úıdiń terezesinen qulap ketkeni habarlanǵan bolatyn.
Qaraǵandy oblystyq TJD turǵyndardy balalardy jalǵyz qaldyrmaýǵa, olardyń terezeden qulap ketýiniń aldyn alýǵa shaqyrady.
