Qaraǵandyda úsh kósheniń turǵyndary elektr jaryǵynsyz qaldy
QARAǴANDY. QazAqparat – Qaraǵandyda transformatorlyq qosalqy stantsııa tolyǵymen órtenip ketti. Oqıǵa saldarynan úsh kósheniń úıleri elektr jaryǵynsyz qaldy, dep habarlaıdy QazAqparat tilshisi.
Transformatorlyq qosalqy stantsııadaǵy órttiń saldarynan Qaraǵandynyń segiz kópqabatty úıi jaryqsyz qaldy. Bul Kostenko, Abaı jáne Jambyl kóshelerindegi úıler.
«26 qyrkúıek kúni saǵat 17:44 órt týraly habar kelip tústi. Qaraǵandy qalasynyń Buqar Jyraý dańǵyly, №12 úıdiń mańynda 20 metr elektr symdary janyp, jalyn transformatorlyq qosalqy stantsııanyń janǵysh bólikteri, elektr sanaýyshtary jáne aǵash konstrýktsııalaryn sharpyp, jalpy alańy 40 sharshy metr aýmaqty aldy. Órt 18:44 sóndirildi. Qaza bolǵandar men zardap shekkender joq. Aldyn ala boljam boıynsha órttiń sebebi elektr symdarynyń qysqa tuıyqtalýy boldy», - dep habarlady Qaraǵandy oblysy TJD baspasóz qyzmeti.
Búgin qala ákimi Ermaǵanbet Bólekpaev óziniń Facebook paraqshasynda kún sońyna deıin úılerdi elektrmen jabdyqtaý qalpyna keltiriletinin habarlady.
«Qazirgi ýaqytta bólshekteý júrgizilýde, sodan keıin olar 2 transformatordy ornatýdy bastaıdy. Búgingi kúni Kostenko kóshesi 1,3, Abaı kóshesi 2,4,6, Jambyl kóshesi 1,3,5 úılerin elektrmen jabdyqtaý qalpyna keltiriledi», - dep jazady Qaraǵandy qalasynyń ákimi.
