Qaraǵandyda úsh qosalqy jedel járdem stansasy salynady
QARAǴANDY. QazAqparat - Qaraǵandyda úsh qosalqy «Jedel járdem» stansasy salynady, dep habarlady «QazAqparat» HAA tilshisi.
Oblys ákiminiń medıtsına qyzmetkerlerimen kezdesýinde Qaraǵandy oblystyq densaýlyq saqtaý basqarmasynyń basshysy Erjan Nurlybaev úsh «Jedel járdem» qosalqy stansasyn turǵyzýdyń jobalyq-smetalyq qujattamasyn ázirleýge qarajat bólingenin habarlady.
«Qurylysty 2018 jyly bastaý josparlanǵan. Eki qosalqy stansa Maıqudyqta, bireýi - Qaraǵandy mańyndaǵy Sortırovkada salynady. Atalǵan jobany júzege asyrý shuǵyl járdem kórsetý sapasyn jaqsartyp, tótenshe shaqyrtýlar boıynsha dárigerlerdiń kelý ýaqytyn qysqartýǵa múmkindik beredi», - dep habarlady oblystyq densaýlyq saqtaý basqarmasynyń basshysy.
Buǵan deıin Biryńǵaı dıspetcherlik jeli engizilip Qaraǵandy oblysyndaǵy «Jedel medıtsınalyq járdem» qyzmetiniń ońtaılana túsetini habarlanǵan edi. Atalmysh qyzmettiń barlyq kólikterine jedel medıtsınalyq qyzmet stansasynyń ortalyǵynan basqaryp otyratyn GPS anyqtaýyshy ornatylyp jatyr. Qalalar men aýdandardaǵy «Jedel járdemge» kelip túsken barlyq qońyraýlar biryńǵaı aqparattyq júıege tirkeledi. Osylaısha, qyzmettiń jedeldigi men tıimdiligi artady jáne shaqyrý ornyna kelý ýaqyty qysqarady.
