Qaraǵandyda úsh qabatty kottedji bar turǵyn AÁK alǵan
Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnisbekova Qaraǵandy oblysy turǵyndarynyń áleýmettik qyzmetkerlerdi aldaýynyń óreskel faktileri týraly habarlady. Onyń aıtýynsha, AÁK taǵaıyndaý kezinde eń kóp kezdesetin buzýshylyq – naqty kiristerdi jasyrý, otbasynyń turmys jaǵdaıy men ómir súrý sharttary týraly jalǵan aqparat berý bolyp tabylady.
«Osylaısha, Qaraǵandy qalasynda 8 bala tárbıelep otyrǵan kópbalaly otbasy 2019 jylǵy mamyr aıynda AÁK taǵaıyndaýǵa ótinish bildirdi. Otbasyna aı saıyn jalpy somasy 105 myń 843 teńgeni quraıtyn 2 mln 339 myń 688 teńge kóleminde áleýmettik kómek taǵaıyndaldy. Bizdiń Basqarmanyń júrgizgen AÁK taǵaıyndaýdyń zańdylyǵyn tekserý kezinde bul otbasy jalpy aýdany 100 sharshy metrden asatyn úsh qabatty kottedjde turatyndyǵy anyqtaldy. Onyń ústine, jeke menshiginde kóligi bar, ıaǵnı olardyń turmys jaǵdaıy jaqsy. Atalǵan otbasyna qaıta esepteý júrgizilip, nátıjesinde olarǵa AÁK taǵaıyndaýdan bas tartyldy», – dedi Ásem Júnisbekova.
Onyń aıtýynsha, áleýmettik kómekti zańsyz jolmen alý maqsatynda keıbir qaraǵandylyqtar naqty turatyn nemese ýaqytsha tirkelgen meken-jaıyn jasyrmaqshy bolǵan. Mysaly, AÁK alýshylardy aralaý barysynda turatyn meken-jaıyn jalǵan kórsetip, aı saıyn 108 myń 882 teńge kóleminde jalpy somasy 1 mln 306 myń teńge tólem taǵaıyndalǵan otbasy anyqtaldy. Al, shyn máninde otbasy qymbat jóndeýden ótken eki qabatty kottedjde turady, jeke menshiginde avtomashınasy bar.
Qaraǵandy oblysy boıynsha barlyǵy ataýly áleýmettik kómek tóleý 92 otbasyna ýaqytsha jáne 890 otbasyna múlde toqtatyldy. 1 myń 621 otbasyna qaıta esepteý júrgizildi.
Esterińizge sala keteıik, AÁK taǵaıyndaý men tóleýdiń durystyǵyn monıtorıngteý nátıjesinde 73 myńnan astam ataýly áleýmettik kómek alýshy tabysy týraly jalǵan aqparat bergeni anyqtaldy.
Osyǵan baılanysty QR Eńbek jáne halyqty áleýmettik qorǵaý mınıstrligi ákimdiktermen birlese otyryp, árbir anyqtalǵan fakti boıynsha, buzýshylyqtarǵa jol bermeý jáne «Memlekettik ataýly áleýmettik kómek týraly» QR Zańyn buza otyryp taǵaıyndalǵan tólemderdi qaıta qaraý boıynsha jeke-jeke jumys júrgizýde. Bul baǵyttaǵy jumys jalǵastyrylýda.
Budan buryn habarlanǵandaı, aǵymdaǵy jylǵy 7 qazanda QR Úkimeti otyrysynda Eńbek jáne halyqty áleýmettik qorǵaý mınıstri Birjan Nurymbetov Qazaqstanda 2020 jylǵy 1 qańtardan bastap engizý josparlanyp otyrǵan AÁK kórsetýdiń jańa tetikterin tanystyrǵan bolatyn.
