Qaraǵandyda úsh bala gazdan ýlandy
QARAǴANDY. QazAqparat – Qaraǵandyda jeke úılerdiń birinde peshtiń murjasy durys istemeýinen úsh bala ýly gazǵa tunshyǵyp, qalalyq aýrýhanalardyń birine jetkizildi, dep habarlaıdy QazAqparat tilshisi.
9 qazan kúni saǵat 11:00-de Qaraǵandy qalasynyń Oktıabr aýdanynda jeke turǵyn úıde jylytý peshin durys paıdalanbaý jáne tútin shyǵatyn murjanyń aqaýynan 2006, 2011 jáne 2013 jyly týǵan balalar ýly gazdan ýlanyp, aýrýhanaǵa jatqyzyldy.
Jyl basynan beri Qaraǵandy oblysynda 5 adam gazǵa ýlanyp qaza tapqan, 10 adam zardap shekti.
Turǵyn úı sektorynyń turǵyndary úshin jylytý maýsymy kezinde jylytý quraldaryn paıdalaný úlken qaýip týǵyzady. Al peshti qoldaný erejelerin buzý tunshyqtyrǵysh gazdan ýlaný sııaqty aýyr zardaptarǵa ákelýi múmkin.
Tunshyqtyrǵysh gazdan ýlaný kóbine peshti durys qoldanbaýdan bolady.
Tunshyqtyrǵysh gazdan qalaı saqtaný kerek:
-Órt qaýipsizdigi talaptaryn saqtańyzdar;
- Peshpen jylytýdy paıdalaný erejelerin buzbańyz: pesh japqyshynyń ýaqytynda jabylýy, otynǵa taza aýanyń jetkiliksiz bolýy, nashar tartý úı-jaıda ýly gazdyń paıda bolýyna ońaı sebep bolýy múmkin;
- Peshti paıdalanbas buryn tútin murjasyndaǵy tartqyshty, sondaı-aq onyń bútindigin jáne jaryqtyń joqtyǵyn tekserińiz;
- Avtonomdy gaz qazandyǵy, sondaı-aq gaz plıtasy ornatylǵan úı-jaılarda ol qosylyp turǵan kezde jeldetý qamtamasyz etilýi tıis.
