Qaraǵandyda úsh apta buryn joǵalǵan áıeldiń máıiti tabyldy
QARAǴANDY. QazAqparat - Búgin Qaraǵandyda osydan úsh apta buryn iz-túzsiz joǵalyp ketken 27 jastaǵy áıeldiń máıiti tabyldy. Marqumnyń denesinde pyshaq jaraqaty bar, dep habarlaıdy QazAqparat tilshisi.
27 naýryz kúni Qaraǵandy qalasy, Qazybek bı aýdanyndaǵy ormanda buryn iz-túzsiz joǵalǵandar sanatynda bolǵan, denesinde pyshaq jaraqaty bar 27 jastaǵy azamatshanyń máıiti tabyldy.
Atalǵan fakti boıynsha Qazaqstan Respýblıkasy Qylmystyq kodeksiniń 99 baby 1 tarmaǵyna sáıkes sotqa deıingi tergeý bastaldy.
«Jedel-izdestirý is-sharalaryn júrgizý barysynda krımınaldyq polıtsııa qyzmetkerlerimen osy iske qatysy bar degen kúdikpen 27 jastaǵy kúdikti anyqtaldy. Ustalǵan azamatsha 5 naýryz kúni jábirlenýshimen ekeýara úıde shyqqan janjal barysynda ony pyshaqtap, qylmysyn jasyrý maqsatynda máıitti kómip tastaǵanyn aıtyp, qylmysyn moıyndady. Kúdikti ýaqytsha ustaý ızolıatoryna qamalyp, tergeý jalǵasyp jatyr», - dep habarlady Qaraǵandy oblysynyń PD baspasóz qyzmeti.
