Qaraǵandyda úsh adamnyń ómirin qıǵan órttiń sebebi anyqtaldy
QARAǴANDY. QazAqparat - Qaraǵandy oblysynyń TJD baspasóz máslhatynda Ermekov kóshesi boıyndaǵy kópqabatty úıde bolǵan órtke qatysty málimet berildi. Bir kúnde bir-birimen eshqandaı baılanysy joq túrli jaǵdaı jóninde eki qońyraý kelip túsken, dep habarlaıdy QazAqparat tilshisi.
Saǵat 12.30-da shatyrda tútin shyqqandyqtan órt sóndirýshiler shaqyrylǵan. Qońyraý №7-shi kireberis turǵyndarynan kelip túsken. Kelgen qutqarýshylar shatyrdy jabý kezinde órt qaýipsizdiginiń saqtalmaǵandyǵyn anyqtady. Kináliler jazalandy.
Bul oqıǵa odan keıin bolǵan №11-shi kireberistiń toǵyzynshy qabatyndaǵy páterdegi órtke eshqandaı qatysy joq. Qazirgi boljam boıynsha, úsh adamnyń ómirin qıǵan órttiń shyǵýyna jylytqysh sebepshi boldy.
Spıker, «jylytý maýsymy bastalǵanda páterde nelikten jylytqysh qosylǵan?» degen suraqqa jaýap berdi. «Teplotranzıt» JShS dırektorynyń tehnıkalyq orynbasary Ivan Vytkınniń aıtýynsha, bul úıge jylý jiberý kezinde №9 kireberistiń jertólesinde jylý trassasynda aqaý baıqalǵan. Búginde PIK qyzmetkerleri aqaýdy joıdy, jaqyn arada jylý beriletin bolady.
«Qubyrlardaǵy anyqtalǵan aqaý – bul birinshi kezekte PIK-tiń tolyqqandy jumys istemeýiniń saldary. Páter ıeleri kooperatıvteriniń barlyq basshylaryna júgingim keledi. Jumysyńyzǵa barynsha jaýapkershilikpen qaraý kerek. Kóp nárse basqarý organdarynyń kondomınıýmdar aýmaǵynda qalaı durys jumys isteıtinine baılanysty», - dedi Qaraǵandy qalasynyń Qazybek bı atyndaǵy aýdanynyń ákimi Nurlan Rystın.
Eske sala keteıik, 7 qazan kúni Qaraǵandyda 9-qabattaǵy eki bólmeli páterdiń 50 sharshy metr aýmaǵyn órt sharpyǵan. Órtengen páterde úsh adam mert boldy. Olar - 78 jastaǵy jáne 35 jastaǵy áıelder men bir jasqa tolmaǵan náreste.
Ermekov kóshesinde oryn alǵan atalmysh tótenshe jaǵdaıǵa qatysty tergeý baqylaýǵa alyndy. Nátıjeler keıin jarııalanatyn bolady.
