Qaraǵandyda úsh adam qaza tapqan alapat órtke qatysty qylmystyq is qozǵaldy
Kópqabatty úıde bolǵan órt deregi boıynsha polıtsııa qyzmetkerleri Qylmystyq kodekstiń 204-baby 2-tarmaǵyna (otpen nemese qaýiptiligi joǵary ózgede kózdermen jumys isteý arqyly jasalǵan aýyr zardaptarǵa ákelgen bótenniń múlkin joıý nemese búldirý) sáıkes qylmystyq is tirkedi.
Atalǵan baptyń sanktsııasynda 2 myń aılyq eseptik kórsetkish mólsherinde aıyppul nemese sol mólsherde túzeý jumystary nemese 2 jylǵa deıin bas bostandyǵynan aıyrý jazasy kózdelgen.
Qazirgi ýaqytta tıisti saraptamalar taǵaıyndaldy. Tergeý amaldary júrip jatyr.
Eske sala keteıik, 10 qańtar kúni saǵat 21:29-da Qaraǵandy qalasynda Respýblıka dańǵyly, 18/2mekenjaıynda órt shyqqany týraly habar tústi.
16 qabatty, bir kireberisti, 127 páterli turǵyn úıdiń 8-qabatyndaǵy páterde jalpy alańy 30 sharshy metr aýmaqta órt shyqqan.
1979 jyly týǵan er adam janyp jatqan páterdiń balkonynan qulap, medıtsınalyq mekemege jatqyzyldy.
Tekserý barysynda úsh adamnyń denesi tabyldy (boljam boıynsha eki er adam men áıel).
Sondaı-aq, Qaraǵandy oblysynyń TJD basshylyǵy gaz jarylysy rastalmaǵanyn habarlady. Oqıǵa ornynda gaz qurylǵylary tabylmaǵan.
