Qaraǵandyda ýnıversıtet aýmaǵynda termos-jylyjaı salynýda

QARAǴANDY. QazAqparat – Akademık E. A. Bóketov atyndaǵy Qaraǵandy ýnıversıtetiniń bıologııa-geografııa fakýltetiniń aýmaǵynda jerasty jylyjaı qurylysy júrip jatyr. Onda ǵylymı-zertteý jumystary júrgizilip, ýnıversıtettiń qajettilikteri úshin kóshetter ósiriledi, dep habarlaıdy QazAqparat tilshisi.

Ýnıversıtet ǵalymdary jylyjaı salý týraly 15 jyl buryn oılaǵan. Biraq ol kezde jer ústi qurylysy týraly aıtylǵan.

«Biz kópten beri óz jylyjaıymyzdy salǵymyz keldi. Jer ústinde arnaıy bólme salýdy oıladyq. Biraq ony ustaý óte qymbat jáne kúrdeli bolatynyn túsindik, sebebi bizdiń aımaqta jaz óte ystyq jáne qysy sýyq. Jerasty jylyjaılaryn qurý tehnologııasy bar. Mundaı qurylymdar Soltústik Eýropa elderinde keńinen qoldanylady. Úsh jyl buryn Sátbaevta jergilikti kásipker termos-jylyjaı saldy. Bizdiń ǵalymdar oǵan qysta baryp, jylyjaıdyń jaǵdaıymen tanysty», – deıdi bıologııa-geografııa fakýltetiniń dekany Serikbolat Taljanov.

Ýnıversıtet basshylyǵy ǵalymdardyń ıdeıasyn qoldap, jylyjaı salýǵa jáne aýmaqty abattandyrýǵa 200 mln teńgeden astam qarajat bóldi.

Jylyjaı-termostyń qurylysy naýryz aıynda bastaldy. Munda eki bólim bolady. Olardyń biri stýdentterdi oqytýǵa jáne ǵylymı-zertteý jumystaryn júrgizýge arnalǵan. Basqa bólimde olar óz qajettilikteri úshin kóshet ósiredi jáne tálimbaq jasaıdy.

Abattandyrý aıasynda shamamen 2 gektar jerge 700-den astam aǵash otyrǵyzyldy. Qylqan japyraqty jáne jalpaq japyraqty ósimdikterdiń 14 túri bolady. Avtomatty sýarý ornatyldy.

Barlyq jumystardy qyrkúıek aıynda aıaqtaý josparlanýda.