Qaraǵandyda Ulttyq ulannyń áskerı bólimine 400 jas sarbaz qabyldandy

QARAǴANDY. QazAqparat - Qaraǵandy qalasyndaǵy Ulttyq ulannyń 6505 áskerı bóliminde saltanatty túrde áskerı ant qabyldaý rásimi ótti. Otan aldynda boryshyn óteýge 400-den astam sarbaz ant etti, dep habarlaıdy QazAqparat tilshisi.

Sarbazdarǵa sáttilik tilep, jyly lebiz bildirý úshin Ulttyq ulan «Ortalyq» óńirlik qolbasshylyǵynyń basshylyǵy, bólimniń ardagerler quramy men sarbazdardyń ata-analary arnaıy keldi. Іs-sharany qurama komandıri polkovnık Mamaı Qurmantaev quttyqtaý sózimen bastady.

«Sarbazdar, búgin sapta turǵan árbireýiń úshin jaýapty kúnderdiń biri. Áskerı antty er jigit ómirinde tek bir-aq ret qabyldaıdy, esesine antyna adal bolý, bul máńligikke. Sondyqtan, el qorǵaýshylar, osy kúnnen bastap bólimimizdiń qatarynda adal da abyroıly qyzmet etesińder dep senemin», - dedi qurama komandıri sarbazdarǵa óz senimin bildirip.

Aıta ketelik, atalmysh is-shara barysynda Jambyl, Almaty, Aqmola, Túrkistan oblystarynan shaqyrylǵan 400-den astam jas sarbaz kópshilik aldynda eline aqtyq demi qalǵansha abyroımen qyzmet etýge sert berdi.

«Árbir er azamattyń boryshy — eli men jerin qorǵaý. Búgin, mine, bizdiń shaqyrylym áskerı antyn qabyldap, Otan qorǵaýshy atandy. Antymyzǵa adal bolamyz», - dep jas jetkinshekterdiń qatarynan Jambyl oblysynan shaqyrylǵan qatardaǵy Qýanysh Saǵyndyqov sóz sóıledi.