Qaraǵandyda UǴA jańa akademıkteri men korrespondent-múshelerine kýálik tapsyryldy
Qazaqstan Respýblıkasynyń Ulttyq ǵylym akademııasynda QR UǴA akademıkteri men korrespondent-múshelerin saılaý ótken bolatyn. Osyǵan baılanysty QR UǴA akademıgi ataǵy «Ulttyq neırohırýrgııa ortalyǵy» AQ Dırektorlar keńesiniń tóraǵasy, medıtsına ǵylymdarynyń doktory, professor Májıt Zeınollauly Shaıdarovqa; Organıkalyq sıntez jáne kómir hımııasy ınstıtýtynyń bas ǵylymı qyzmetkeri, hımııa ǵylymdarynyń doktory, professor Serik Drahmetuly Fazylovqa; «Fıtohımııa» halyqaralyq ǵylymı-óndiristik holdınginiń steroıdty qosylystar hımııasy zerthanasynyń meńgerýshisi, hımııa ǵylymdarynyń doktory, professor Borash Igilikuly Tóleýovke berildi.
QR UǴA korrespondent-músheleri bolyp medıtsına ǵylymdarynyń doktory, Qaraǵandy medıtsına ýnıversıtetiniń professory Merýert Arstanqyzy Ǵazalıeva, akademık E.A. Bóketov atyndaǵy Qaraǵandy ýnıversıtetiniń hımııa fakýltetiniń dekany, hımııa ǵylymdarynyń doktory, professor Meıram Júnisuly Búrkeev saılandy.
Ulttyq ǵylym akademııasynyń akademıkteri men korrespondent-músheleri bolyp saılaný úshin 25 bos orynǵa arnalǵan konkýrsqa qatysýǵa 125-ten astam izdenýshi qujat tapsyrǵan. Konkýrsta bir orynǵa 4-5 úmitkerge deıin básekege tústi. Kandıdattardyń baıandamalary tyńdaldy, olardyń árqaısysy óziniń ǵylymı qyzmetiniń nátıjelerin, júrgiziletin zertteýlerdiń ózektiligi, basymdylyǵyn, negizgi ǵylymı jetistikterin baıandady. Úmitkerler óte muqııat irikteldi, kandıdattar týraly pikirler, olardyń ǵylymǵa qosqan jeke úlesteriniń nátıjeleri eskerilip, mamandandyrylǵan bólimderde jasyryn daýys berý arqyly, sodan keıin Ulttyq ǵylym akademııasynyń Jalpy jınalysynyń sessııasynda jasyryn daýys berý arqyly júzege asyryldy.
