Qaraǵandyda TJD basshysy orynbasarynyń soty bastaldy
QARAǴANDY. QazAqparat - Qaraǵandyda oblystyq Tótenshe jaǵdaılar departamenti bastyǵynyń orynbasary Vadım Magamadovtyń ústinen sot isi bastaldy. Ol 200 000 teńge para alǵanyn moıyndaǵan, alaıda ol aqshanyń týrnır ótkizý úshin demeýshilik kómek ekenin málimdegen, dep habarlaıdy «QazAqparat» HAA tilshisi.
Azamattyq qorǵanys polkovnıgi Magamadov pen Qaraǵandy oblystyq prokýrorynyń orynbasary aıyptalýshynyń 12 mıllıon teńge tólep, bostandyqqa jiberiletindigi týraly mámile rásimdegen. Alaıda, sýdıa Janat Egemberdıeva bul isti prokýrormen mámilesiz, jalpy negizde qaraý kerektigin jón dep tapqan. Sýdıa isti qaıta tekserý júrgizý úshin prokýratýraǵa qaıtarǵan. Іs Qaraǵandy qalasy №1 Qazybek bı aýdandyq sotyna túsken. Sýdıa Aıgúl Myrzabekova sot tyńdalymynda azamattyq qorǵanys polkovnıgin qamaýda ustaý merzimin uzartý týraly úkim shyǵardy.
«Sot istiń sotta qaralý kezeńinde Magamadov Vadım Emhadovıchtiń qamaýda ustaý merzimin uzartý kerek dep esepteıdi. Bultartpaý sharasyn ózgertýge eshqandaı negiz joq. Qylmystyq istiń 366-baby 2-tarmaǵy «Para alý» men QR QK 361-baby 2-tarmaǵy «Laýazymdyq ókilettikterdi asyra paıdalaný» boıynsha qylmystyq is óndiriske qabyldandy», - dedi sýdıa Aıgúl Myrzabekova.
Vadım Magamadov saýda úıiniń zańgerinen 200 000 teńge alǵanyn moıyndady, alaıda onyń para emes, týrnır ótkizý úshin demeýshilik kómek ekendigine sendirýde.
