Qaraǵandyda tutqyndardy zańsyz kezdestirgen ızolıator qyzmetkeri sottaldy
QARAǴANDY. QazAqparat - Qaraǵandyda tergeý ızolıatory qyzmetkerine qamaýdaǵylardyń bir-birimen zańsyz kezdesýin uıymdastyrǵany úshin shyǵarylǵan úkim ózgerissiz qaldyryldy, dep habar beredi «QazAqparat» tilshisi.
Qylmystyq ister jónindegi Qaraǵandy oblystyq sotynyń apellıatsııalyq alqasy ádilet kapıtanyn aıypty dep tanyp, Qylmystyq kodekstiń bir baby boıynsha aqtaýdan, taǵy bir baby boıynsha jazasyn jeńildetýden bas tartty. «Apellıatsııalyq shaǵymdy qarap shyǵyp, qylmystyq istiń materıaldary men úkimdi zerttep, alqa: úkimdi ózgerissiz, shaǵymdy qanaǵattandyrýsyz qaldyrý týraly qaýly qabyldady», - deıdi Qylmystyq ister jónindegi Qaraǵandy oblystyq sotynyń apellıatsııalyq alqasynyń tóraǵasy Rashıd Nurmaǵambetov. Sýdıa ızolıator qyzmetkeri tergelip jatqan er adam men áıel kisiniń kezdesýin uıymdastyrǵanyn anyqtaǵan. Sottalǵan kapıtan men onyń advokaty QK 422-babynyń 1-bóligi boıynsha aqtaýdy suraǵan.
El arasynda qyzý talqyǵa túsken osy oqıǵa tergeý ızolıatoryndaǵy áıel júkti bop qalyp, aýrýhanaǵa túskennen keıin belgili bolǵan. Aýrýhanada ol patologııanyń saldarynan abort jasatqan. Keıinnen áıeldiń AITV ınfektsııasyn juqtyrǵany anyqtaldy. Ol urlyq jasady degen aıyp taǵylyp, tergeý ızolıatoryna alynǵan bolatyn.
Kapıtanǵa QR QK 362-babynyń (Bılikti nemese laýazymdyq ókilettikterdi asyra paıdalaný) 2-bóligi, QR QK 422-babynyń (Jalǵan aıǵaqtar berýdi nemese aıǵaqtar berýden jaltarýdy, jalǵan qorytyndy berýdi ne qate aýdarýdy paraǵa satyp alý nemese olarǵa májbúrleý) jáne QR QK 118-baby (Adamnyń ımmýn tapshylyǵy vırýsyn (AITV/JITS) juqtyrý) boıynsha qylmystyq is qozǵalǵan.
Sot aıyptalýshyǵa 2 jyl, 8 aı merzimge bas bostandyǵynan aıyrý jazasyn belgilep, kapıtan ataǵynan aıyrǵan.
