Qaraǵandyda turmysy tómen 70-ten astam otbasynyń úıine ýly gaz datchıkteri ornatylmaq
QARAǴANDY. QazAqparat – Órt qaýipsizdigi aılyǵy aıasynda Qaraǵandy oblysynyń TJD jylytý maýsymy qarsańynda aldyn alý is-sharalaryn jalǵastyrýda. Aýlalardy aralaý arqyly turǵyndarmen túsindirý áńgimeleri júrgizilip, jadynamalar taratylady, dep habarlaıdy QazAqparat tilshisi.
Qaraǵandy oblysynyń TJD qyzmetkerleri jergilikti atqarýshy organdarmen jáne eriktilermen birlesip kópbalaly otbasylardyń, múgedekterdiń, jalǵyz turatyn zeınetkerlerdiń úılerinde tútin datchıkteri men ýly gaz datchıkterin ornatýdy jalǵastyrýda.
Órt qaýipsizdigi aılyǵy bastalǵaly, ıaǵnı 15 tamyzdan beri 28 datchık ornatyldy, taǵy 50 úıge osyndaı qurylǵy ornatý josparlanýda.
«Aýlalardy aralaý barysynda 17000-nan astam adamǵa nusqaý berilip, turǵyndarmen 113-ten astam jıyn ótkizildi. Túsindirý is-sharalary oblystyń barlyq óńirlerinde qamtyldy», - dep málimdedi Qaraǵandy oblysy TJD baspasóz qyzmeti.
Qaraǵandy oblysynyń TJD ókilderi sonymen qatar órt qaýipsizdigi sharalaryn saqtaýdy eske salyp, paıdalaný aldynda jylytý júıesin tekserý, tútindikterdi tazartý, barlyq pesh jabdyqtarynyń tutastyǵyn tekserý, jaryqtardy joıý qajettigin eskertti. Sondaı-aq tek jaramdy elektr qyzdyrǵysh aspaptardy paıdalaný, jelini shamadan tys júktemeý kerektigin tilge tıek etti.
