Qaraǵandyda turmystyq janjal shyqqan úıden 5 kg astam marıhýana tárkilendi

ASTANA. QazAqparat – Qaraǵandyda turmystyq janjal boıynsha shaqyrtýǵa barǵan polıtseıler turǵyn úıden 5 kg astam esirtki tárkiledi, dep habarlaıdy QazAqparat Polisia.kz saıtyna silteme jasap.

Qaraǵandy qalasyndaǵy jeke úılerdiń birinde 27 qazan kúni turmystyq janjal bolǵan. Oqıǵa ornyna patrýldik polıtsııa polkiniń jasaǵy jiberildi. Onda 55 jastaǵy úı ıesi, azamatshanyń 28 jastaǵy uly bolǵan. Ekeýi de – Reseı Federatsııasynyń azamattary. Sonymen qosa, úıde Grýzııadan qonaqqa kelgen 53 jastaǵy azamat ta boldy.

Polıtsııa qyzmetkerleri oqıǵanyń mán-jaıyn anyqtaý barysynda bólmelerdiń birinen sharada turǵan jasyl tústi, ıisi bar, ósimdik tektes zatty baıqaǵan. Tártip saqshylary jedel sharalar nátıjesinde osy úıdiń garajynan qara polımer paketke salynǵan tórt qarasora sabaǵyn jáne esirtki paıdalaný quraldaryn tárkiledi. Saraptama qorytyndysyna sáıkes, tárkilengen esirtki zattary jalpy salmaǵy 5 keli 200 gr marıhýana ekeni belgili boldy.

Ustalǵandarǵa júrgizilgen medıtsınalyq kýálandyrý 28 jastaǵy azamattyń esirtki paıdalanǵanyn kórsetti. Alaıda, ol óziniń esirtki qoldanǵanyn moıyndamady.

Atalǵan derek boıynsha QR Qylmystyq kodeksiniń 296-babyna sáıkes qylmystyq is qozǵaldy. Tergeý amaldary júrgizilip jatyr.

Foto: polisia.kz