Qaraǵandyda túrmedegi áıeldiń júkti bolyp qalýyna baılanysty eki basshy qyzmetinen bosatyldy
QARAǴANDY. QazAqparat - Qaraǵandyda AK 159/1 tergeý oqshaýlaǵyshy jedel bóliminiń bastyǵy men rejımdik jumys boıynsha orynbasary arnaıy mekemede jazasyn ótep jatqan áıeldiń júkti bolýy saldarynan qyzmetterinen bosatyldy, dep habarlaıdy «QazAqparat» HAA tilshisi.
Qaraǵandy oblystyq qylmystyq-atqarý júıesi departamenti bastyǵynyń buıryǵymen bul eki qyzmetkerge eń qatań tártiptik jaza qoldanyldy - olar laýazymdy qyzmetterinen bosatyldy.
Urlyq jasaǵany úshin sottalǵan áıel erler blogyndaǵy basqa sottalýshymen jaqyndasyp, júkti bolyp qalady. Keıin er adamnyń AITV-ınfektsııasyn taratýshy ekendigi anyqtaldy. Qazirgi tańda ol kolonııada emdelip jatyr.
Tergeý nusqasy boıynsha, rejımdik nysanda eki sottalýshynyń kezdesýine kómektesken oqshaýlaǵysh qyzmetkerine qatysty sot tyńdalymy júrip jatyr.
Oǵan Qylmystyq kodekstiń úsh baby - 362-bap «laýazymdyq ókilettikterdi asyra paıdalaný», 422-bap «Jalǵan aıǵaqtar berýdi nemese aıǵaqtar berýden jaltarýdy, jalǵan qorytyndy berýdi ne qate aýdarýdy paraǵa satyp alý nemese olarǵa májbúrleý», sondaı-aq 118-bap «Adamnyń ımmýn tapshylyǵy vırýsyn (AITV/JITS) juqtyrý» boıynsha aıyp taǵylýda.
