Qaraǵandyda turǵyn úıde shyqqan órtten 14 adam qutqaryldy
QARAǴANDY. QazAqparat – Qaraǵandylyq qutqarýshylar órtengen turǵyn úıden 14 adamdy alyp shyqty. Kópqabatty úıdi sharpyǵan otty sóndirýge 12 maman jáne 3 arnaıy tehnıka jumyldyryldy, dep habarlaıdy QazAqparat tilshisi.
18 qańtarda saǵat 14:04-te Qaraǵandy qalasynyń 22 shaǵyn aýdanyndaǵy páterdiń órtengeni týraly habarlama kelip túsken. Saǵat 14:10-da shaqyrý ornyna kelgen órt sóndirýshiler turǵyn úıdiń kireberisindegi qoıý tútindi kórgen. Gaz-tútinnen qorǵaý qyzmetiniń eki toby ishtegi turǵyndardyn qutqarýǵa jáne evakýatsııalaýǵa kirisken. Órt úshinshi qabattaǵy páterde shyqqany anyqtalǵan.
Kúıik shalǵan jáne ýlanyp qalǵan áıel órt shyqqan páterden qutqarylyp, jedel járdem qyzmetkerlerine tapsyryldy. Sondaı-aq kórshi páterden tórt aılyq bala qutqaryldy. Qalyń tútinnen ýlaný qaýpi joǵary bolǵandyqtan balaǵa basyn jáne tynys jolyn qorǵaıtyn arnaıy maska kıgizildi. Turǵyn úıden taǵy 12 adam evakýatsııalandy.
«Jalyndy sóndirýge Qaraǵandy oblysy TJD Órt sóndirý qyzmetiniń №9 órt sóndirý bóliminiń 12 mamany men 3 tehnıkasy jumyldyryldy. Órt 14:35-te tolyq sóndirildi. Jalyn otty abaısyz qoldanýdan bolǵan», - dep málimdedi Qaraǵandy oblysy TJ departamentiniń baspasóz qyzmetinen.
