Qaraǵandyda týrfırma basshysy sottaldy
QARAǴANDY. QazAqparat - Qaraǵandy qalasynyń Qazybek bı aýdandyq sotynda týrısterdi aldap soqqany úshin «Faraon» fırmasynyń basshysy Janar Abeýpke qatysty sot sheshimi shyǵaryldy, dep habarlaıdy «QazAqparat» HAA tilshisi
«J. Abeýp QR QK 190-babynyń 2-tarmaǵy 1,3 tarmaqshalarynda qarastyrylǵan qylmystyq is jasaǵany (iri kólemdegi alaıaqtyq) úshin kináli dep tanylsyn. Onyń múlki tárkilenip, jalpy rejımdegi túzeý kolonııasynda 4 jyl 6 aı merzimge bas bostandyǵynan aıyrý jazasy belgilensin», - dep Qazybek bı aýdandyq sotynyń sýdıasy Janat Egemberdıeva úkimdi jarııalady.
Sot týrfırmanyń jetekshisinen zardap shegýshilerge materıaldyq shyǵyn keltirgeni úshin ondaǵan mıllıon teńge óndirip aldy. Moraldyq zalal keltirilgendigi týraly ótinish qanaǵattandyrylǵan joq.
Sonymen qatar, memleket paıdasyna 486,5 myń teńge kóleminde memlekettik baj óndirildi.
Úkim zańdy kúshine engen joq jáne shaǵym túsirý nemese apellıatsııaǵa berý múmkindigi bar.
Esterińizge sala keteıik, Qaraǵanydyda 2015 jyldyń jazynda kezekti týrıstik daý týyndaǵan bolatyn. Ol kezde «Faraon» fırmasynan Túrkııaǵa joldama satyp alǵan klıentter demalysqa kete almaı qalǵan edi. Aldanyp qalǵan adamdar polıtsııaǵa shaǵymdanyp, al týrfırmanyń jetekshisi Janar Abeýp ustalǵan bolatyn. Artynsha oǵan iri kólemdegi alaıaqtyq baby boıynsha aıyp taǵyldy.
J. Abeýptyń ákesi prokýratýra organdarynyń qurmetti ardageri, ol kezinde oblystyq prokýratýra bóliminiń bastyǵy qyzmetin atqarǵan.
Týrfırmanyń áreketinen 100-den astam adam zardap shekti. Shyǵyn 400 myń AQSh dollary kóleminde baǵalandy. 2015 jyldyń 6 qazanynda J. Abeýp sot sanktsııasymen qamaýǵa alyndy. Kúdikti tergeý ızolıatorynda otyryp úshinshi sábıin dúnıege ákelgen. Alaıda, balanyń dúnıege kelýi onyń jaýaptan jaltarýyna tosqaýyl bolǵan joq. 2016 jyldyń 1 tamyzynda basty sot talqylaýy bastaldy.
Týrıstik agenttikter qaýymdastyǵynyń málimetinshe, týrfırma naryqta qyzmet etkenine bes jyl bolǵan jáne ózin eń arzan operator retinde kórsetip kelgen.
