Qaraǵandyda túngi sot qyzmetin jolǵa qoıý máselesi qaralýda
QARAǴANDY. QazAqparat - Qaraǵandy oblysynyń prokýratýrasy, Іshki ister departamenti jáne soty túngi sot qurý týraly úsh jaqty memorandým ornatty, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
«Qazaqstanda túngi sot - jańa bastama, alaıda álemdik tájirıbede ol júzege asyrylýda. Bul pılottyq joba, jáne de ony biz jol-kólik oqıǵalary kezinde bolatyn ákimshilik quqyqbuzýshylyqtarǵa qatysty qoldanýdy kózdep otyrmyz. Bolashaqta mundaı sottar oblysymyzdyń barlyq aýdandarynda jumys isteıtin bolady», - dedi Qaraǵandy oblystyq sotynyń tóraǵasy Musabek Álimbekov.
Qaraǵandy qalasynyń mamandandyrylǵan aýdanaralyq ákimshilik sotynyń tóraǵasy Kemeńger Imashevtiń aıtýynsha, túngi sot ákimshilik quqyqbuzýshylyq týraly isterdi qarastyrý merzimin 100 kúnnen 15 kúnge deıin qysqartatyn bolady.
«Túngi sot ne úshin qajet? Naqty aıtar bolsaq, jol apaty bolǵan jaǵdaıda polıtseı hattama rásimdeý kezinde júrgizýshiniń kinási dáleldenip, ol ony moıyndasa. Avtokólik ıesi saqtandyrý tólemin qashan alady?
Aldymen ol polıtsııa materıaldardy sotqa bergenin kútedi, sonan soń ony sot tóresi qarastyrǵansha ýaqyt ótedi. Sonan keıin sot sheshimi zańdy kúshine enýi tıis, tek sodan soń ǵana saqtandyrý tólenedi. Barlyǵyna 3 aıdan astam ýaqyt ketedi. Osy ýaqyt aralyǵynda kólik turýy tıis. Jáne de júrgizýshiler quqyq buzýmen kelisetin jaıttar 70 paıyzdan asady.
Túngi sot bul problemany sheshýi tıis. Túngi sotta isti qarastyrý úshin nebári eki shart bolýy qajet: kináni moıyndaý jáne keshki ýaqytta sot sisin qarastyrýǵa kelisimniń bolýy. Hattamany rásimdegen soń materıaldar bir táýlik ishinde ákimshilik sotqa jiberiledi. Sol kúni sot isti qarastyrýdy taǵaıyndaıdy. Úshinshi táýlikte eki jaq sot úkimin alyp, sot qujatpen saqtandyrý kompanııasyna barady. Osylaısha, isti qarastyrý merzimi 15 kúnge deıin qysqarady, bul rette onyń zań júzine enýi de osy ýaqyt aralyǵyna kiredi, - dep túsindirdi Kemeńger Imashev.
Túngi sottyń jumys ýaqyty - 18.30-dan 22.00-ge deıin.
«Eń bastysy, bizdiń azamattar úshin qolaıly bolady. Olar birinshiden, tez arada isti qarastyryp, shyǵyn sebebin anyqtaıdy. Ekinshiden, olar ýaqyt únemdeıdi. Úshinshiden, jaýapty jaqpen baılanysty suraqtar, ıaǵnı shyǵyndy óteý sııaqty máseleler sheshiledi. Bolashaqta túngi sottarda sondaı-aq otbasylyq-turmystyq qatynastar, kishigirim buzaqylyqtar jáne kóshi-qon salasyndaǵy zań buzýshylyqtar qarastyrylýy múmkin», - dedi Qaraǵandy qalasynyń mamandandyrylǵan aýdanaralyq ákimshilik sotynyń tóraǵasy.
