Qaraǵandyda trotýarlardy tazalaýǵa arnalǵan arnaıy tehnıka satyp alyndy

QARAǴANDY. QazAqparat – Qaraǵandyda saıabaqtar men trotýarlardy tazartý úshin arnaıy shaǵyn traktorlar satyp alyndy. Bul týraly qala ákimi Ermaǵanbet Bólekpaev brıfıngte málimdedi, dep habarlaıdy QazAqparat tilshisi.

Kún sýyta bastaǵaly qaraǵandylyqtardyń trotýarlarǵa durys kútim jasalmaıtyny týraly shaǵymdary kóbeıdi. Qala bıligi bul máseleni joldardy tazartý úshin arnaıy tehnıka satyp alý arqyly sheshti.

«Qazir saıabaqtar basqarmasy trotýarlardy tazalaý úshin shaǵyn kólemdi tehnıka satyp aldy. Alǵashqy 4-eýi keldi, taǵy 10-y jetkizilýin kútip otyrmyz. Olar jeltoqsannyń birinshi onkúndiginde keledi. Kelesi jyly biz taǵy 10 nemese 15 tehnıka satyp alýdy josparlap otyrmyz. Bul tehnıka búkil qala boıynsha jumys isteıtin bolady», - dedi qala basshysy Ermaǵanbet Bólekpaev.

Trotýarlardy sebýge keletin bolsaq, Qaraǵandy ákiminiń aıtýynsha, bul másele de sheshimin tapqan. Turǵyndardyń qum-tuz qospasynyń sapasy týraly shaǵymdaryna Ermaǵanbet Bólekpaev arnaıy qospanyń óte qymbat ekenin aıtyp túsindirdi.

«Iá, muzǵa qarsy qum tuzy qospasyna qatysty problemalar boldy. Eń durysy, ony múldem qoldanbaǵan jón, mysaly, arnaıy qospany qoldanǵan durys, biraq ol óte qymbat. Tipti Astanada mundaı qospa tek negizgi joldarda qoldanylady. Sondyqtan biz qum-tuz qospasyn paıdalanýǵa májbúrmiz. Bul qospanyń sapasyna qatysty suraqtar boldy, biraq qazir merdiger aýdan ákimdigi qyzmetkerleriniń baqylaýymen qospany muqııat elekten ótkizip jatyr», - dep túsindirdi Qaraǵandy ákimi.