Qaraǵandyda tranzıttik kólikterge aınalma jol salynady

QARAǴANDY. QazAqparat - Qaraǵandyny tranzıttik kólikter leginen aryltý úshin jergilikti bılik aınalma jol salý isin qolǵa aldy, dep habarlaıdy «QazAqparat» HAA tilshisi.

«Qaraǵandydan táýligine 22 myń avtokólik júrip ótedi. Qaladaǵy kólik qozǵalysyn jeńildetý kerek. Sol sebepti biz soltústik jáne shyǵys júrý joldaryna aınalma jol salý bastamasyn qolǵa alyp otyrmyz. Joba óte mańyzdy bolǵanymen, kóp qarajatty qajet etedi. Oǵan 34 mıllıard teńge kerek. Qazirgi ýaqytta osy másele boıynshy tıisti mınıstrliktermen kelissózder júrgizilip jatyr, nátıjesi oń sheshimin tabady dep úmittenemiz. Bastapqy kelisim bar, mınıstrler jobanyń mańyzdylyǵy men ózektiligin túsinip otyr», - dedi Qaraǵandy oblysynyń ákimi Erlan Qoshanov jýrnalıstermen kezdesýinde.

Sonymen qatar, ákim oblystyq mańyzy bar tas joldardyń basym bóligi úlken júk tasymaldaýshy kólikterdiń kesirinen buzylatyndyǵyn aıtyp ótti.

«Úlken júk kólikter tıesili kásiporyndardyń ıelerimen áńgimelestik. Kásiporyndardy jol jóndeý jumysyna tartý arqyly máseleni sheshemiz. Ózderi buzady eken, ózderi qarajattaryna jóndetýdi moıyndaryna alsyn», - dedi Erlan Qoshanov.