Qaraǵandyda transformator órtenip, turǵyndar jaryqsyz qaldy
QARAǴANDY. QazAqparat – Qaraǵandy qalasynda transformator qosalqy stansasy tolyq órtenip ketti. Oqıǵa saldarynan qaladaǵy úsh kóshe jaryqsyz qaldy, dep habarlaıdy QazAqparat.
Transformator qosalqy stansasyndaǵy órt saldarynan Qaraǵandynyń segiz kópqabatty úıinde jaryq óship qalǵan. Bul Kostenko, Abaı jáne Jambyl kóshelerindegi úıler.
«26 qyrkúıek kúni saǵat 17:44-te Qaraǵandynyń Buqar jyraý dańǵylynda órt shyqqany týraly habarlama kelip tústi. №12 úıdiń mańynda elektr symdary, elektr esepteýish quraldarynyń janatyn bólikteri jáne qosalqy stansanyń aǵash qurylysy órtengen. Jalyn 40 sharshy metr aýmaqty sharpyǵan. Órt saǵat 18:44-te tolyq sóndirildi. Qaza bolǵandar men zardap shekkender joq. Aldyn ala nusqa boıynsha, órttiń shyǵýyna elektr symdarynyń tuıyqtalýy sebep bolǵan», - dep málimdedi Qaraǵandy oblystyq TJD-niń baspasóz qyzmetinen.
Búgin qala ákimi Ermaǵanbet Bólekpaev Facebook áleýmettik jelisindegi paraqshasynda elektrmen jabdyqtaý bir kún ishinde qalpyna keltiriletinin málimdedi.
«Transformatorlyq qosalqy stansadaǵy órt jaǵdaıy boıynsha: úıindiler túnde jınaldy, jabdyqtarǵa qol jetkizý qamtamasyz etildi. Qazirgi kezde demontajdaý jumystary júrgizilýde, odan keıin eki transformatordy montajdaýǵa kirisedi», - dep jazdy Qaraǵandy ákimi.
