Qaraǵandyda toıdy toqtatý úshin polıtsııa meıramhanany qorshaýǵa alǵan
«7 tamyz kúni «109» telefonyna qaladaǵy meıramhanalardyń birinde kóptegen adamdar, kólikterdiń jınalǵandyǵy týraly habarlama tústi. Oqıǵa orynyna quramynda polıtsııa, sanepıdemıstantsııa jáne Qaraǵandy qalalyq ákimdiginiń qyzmetkerleri bar mobıldi top shyqty. Fakti rastaldy. Kóńil kóteretin orynda kólikter men adamdardyń kóptigine baılanysty, mobıldi top qyzmetkerleri qoǵamdyq qaýipsizdikti qadaǵalap, ǵımaratty qorshaýǵa alýǵa úshin qosymsha polıtsııa jasaǵyn shaqyrdy», - delingen habarlamada.
Qaraǵandylyq tártip saqshylary meıramhananyń kishi zalynda 38 jastaǵy azamattyń uıymdastyrýymen súndet toı ótip jatqanyn anyqtaǵan.
«Toıǵa 40 adam qatysqan. Al, úlken zalda 57 jastaǵy qala turǵynynyń uıymdastyrýymen qyz uzatý toıy ótkizilip jatqany belgili boldy. Ol toıǵa shamamen 350 adam shaqyrylǵan. Polıtsııa qyzmetkerlerimen mobıldi toptyń qabyldaǵan is-sharalarynyń arqasynda merekelik shara toqtatyldy», - dep habarlaıdy oblystyq vedomstvodan.
PD-niń baspasóz qyzmeti habarlaǵandaı, atalǵan faktiler boıynsha ákimshilik hattama toltyrylyp, sanıtarlyq-epıdemıologııalyq qyzmettiń qaraýyna jiberildi.
Aıta ketsek, buǵan deıin habarlaǵanymyzdaı Qaraǵandy oblysynyń ákimdiginde karantın shekteýin saqtamaı, toı jasaǵan sheneýnikke qatysty málimdeme jasady.
«Atalǵan memlekettik qyzmetshige qatysty arnaıy tekserý taǵaıyndalady, karantın shekteýi saqtamaý faktisi rastalǵan jaǵdaıda, atqaratyn laýazymynan bosatýǵa deıingi eń qatań shara qabyldanady. Sondaı-aq, sanıtarlyq normalardyń buzylýyna baılanysty is-shara toqtatylǵanyn, uıymdastyrýshylarǵa ákimshilik aıyppul salynatynyn habarlaımyn»,- degen bolatyn Qaraǵandy oblysy ákiminiń baspasóz hatshysy Marına Shapovalova.
Eske sala keteıik, keshe 7 tamyzda Qaraǵandydaǵy meıramhananyń birinde joǵary laýazymdy sheneýnik 500 adam shaqyryp, qyz uzatý rásimin uıymdastyrǵan. Mobıldi top toıdy toqtatty.
