Qaraǵandyda tótenshe jaǵdaı kezinde mert bolǵan eki azamat marapattalady
QARAǴANDY. QazAqparat – Qaraǵandy oblysynyń Tótenshe jaǵdaılar departamenti káriz qudyǵyna qulaǵan adamdy qutqaramyz dep kóz jumǵan eki er adamdy marapattamaq, dep habarlaıdy QazAqparat tilshisi.
Esterińizge sala keteıik, 16 shilde kúni túnde saǵat 03:58-de Qaraǵandy oblysy TJD pýltine Qaraǵandy qalasy Býrovaıa kóshesinde jergilikti turǵyndardyń biri Aleksandr Rabotıagov qudyqqa túsip ketkeni jóninde habar kelip túsken. Atalǵan azamat kárizdik aǵyndardy jınaýǵa jáne sorýǵa arnalǵan sorǵy podstantsııasynda tazalaý jumystaryn júrgizýmen aınalysyp jatqan.
Zardap shekkendi qutqaramyz dep sońynan qudyqqa onyń uly Maksım Rabotıagov pen kórshisi Hoshımdjon Abdýloev da túsip ketken.
Saǵat 04: 53 jáne 05: 02 TJD kúshimen úıdiń ıesi men kórshisi kóterilip, medıtsınalyq mekemege jatqyzyldy. Dárigerler zardap shekkenderdiń jaǵdaıy aýyr dep baǵalaǵan. Saǵat 06:30-da TJD jáne «Qaraǵandy Sý» JShS qyzmetkerleriniń kúshimen 1990 jyly týǵan úshinshi er adamnyń denesi tabyldy.
Keıin aýrýhanaǵa jatqyzylǵan eki adam da kóz jumdy.
Maksım Rabotıagov ondaǵan úıge qyzmet kórsetetin káriz júıesindegi aqaýlardy joıýǵa tyrysqan ákesin qutqarý úshin qudyqqa túsken bolatyn. 29 jastaǵy Maksım otbasynda jalǵyz bala bolǵan, bala kezinen óziniń ata-anasyna sharýashylyq boıynsha kómektesýge úırengen. Jumysta ony áriptesteri adal qyzmeti men eńbekqorlyǵy úshin baǵalap, qurmettegen.
«Ol óte izdenimpaz bolatyn, bárine qyzyǵýshylyq tanytýshy edi. Bizge Internette oqyǵany týraly: álemdegi saıası jaǵdaılar, ǵylymı jańalyqtar jáne basqa da kóptegen máseleler týraly aıtyp otyratyn. Áriptesteri oǵan óte jaýapty jumystardy senip tapsyratyn, sebebi ony óte adal adam retinde bildi. Ol ata-anasyn jaqsy kórdi», - dep Maksımdi týǵandary eske alady.
Ekinshi qaza bolǵan jigit, Rabotıagovtardyń kórshisi Hoshımdjon Abdýloev. Ol 30 jasta ǵana edi. Qazaqstan tájik qoǵamynyń belsendileriniń biri boldy. Qaıǵyly oqıǵa saldarynan úsh bala ákesinen aıyryldy.
«Túngi saǵat úsh jarym shamasynda tańǵy namazdy ótkizý úshin turǵan aǵam Hoshım uly men kúıeýin qutqarýdy suraǵan kórshige kómekke bardy. Hoshım oqıǵa ornyna alǵash bolyp jetti. Ol qudyqtaǵy eki adamǵa shuǵyl kómek qajet ekenin, zardap shekken adamdardyń áli tiri ekenin kórip, kómekke umtyldy. Óz ómirine tónýi múmkin qaýip týraly oılamaı, kómek kórsetýin jalǵastyra berdi. Biraq kórshilerimizge kómektesýge tyrysamyn dep, baýyrymyzdyń ózi qaza boldy», - deıdi «Qohı Nor» Tájikstan qoǵamdyq birlestikteri men mádenı ortalyqtary odaǵynyń basqarma tóraǵasy Shákárim Normatov.
«Qaraǵandy oblysynyń TJ departamenti qaza bolǵandardyń otbasylaryna kóńil aıtady. Olardyń árqaısysy basqalardy qutqarý úshin óz ómirin qurban etken naǵyz batyrlyqtyń úlgisin kórsetti. Erlerdiń erlikpen ushtasatyn osyndaı áreketteri óskeleń urpaq úshin úlgi-ónege», - dep málimdedi Qaraǵandy oblysy TJD baspasóz qyzmeti.
TJD marqumdardy marapattaý úshin ótinish jiberedi.
