Qaraǵandyda terek mamyǵy birneshe órttiń shyǵýyna sebep boldy
QARAǴANDY. QazAqparat – Jarty kún ishinde qaraǵandylyq órt sóndirýshiler terek mamyǵynyń tutaný saldarynan paıda bolǵan órtterdi sóndirýge bes márte shyqqan. Osyndaı bir oqıǵa saldarynan turǵyn úıdiń aýlasynda turǵan avtokólikke zaqym keldi, dep habarlaıdy QazAqparat tilshisi.
Qurǵaq jáne ystyq aýa raıynyń saldarynan jabyq aýmaqtaǵy qoqystar men shópterdiń janýy jıilep ketti. Bul qala kóshelerindegi terek mamyǵynyń tutanýymen baılanysty.
Qaraǵandyda órt sóndirý bólimsheleri keshegi kúnniń birinshi jartysynda ǵana 5 ret qoqys pen mamyqtyń janýyna paıda bolǵan órtterdi sóndirýge shyqqan.
Bir jaǵdaıda qoqys pen mamyq janǵan kezde joǵary temperatýranyń áserinen Ermekov kóshesindegi úıdiń aýlasynda ornalasqan avtokóliktiń bamperi búlingen. Oryn alǵan órtterdiń alańy 1 sharshy metrden 20 metrge deıin bolǵan.
«Terek mamyǵy ońaı tutanady, ol oq-dári tárizdes tez janyp, jan-jaqqa lezde tarqap ketedi. Órt terek túbinen taralyp, janatyn materıaldarǵa ótedi, turǵyn úılerge, avtokólikterge, qurylystarǵa qaýip tónedi. Jazǵy órt qaýipti kezeńde órt qaýipsizdigi talaptaryn qatań saqtaý qajet. Terek mamyǵynan eshqaıda qashyp qutylý múmkin emes. Onymen kúresýdiń eń tıimdi tásili - sýmen sýaryp, ony úıip tastaý. Jáne eshbir jaǵdaıda órteýge bolmaıdy!» - dep túsindirdi Qaraǵandy oblysy TJD baspasóz qyzmetiniń ókilderi.
Janýdy boldyrmaý úshin mamyq jınalý oryndaryn kún saıyn jınaý jáne sýarý usynylady. Balalardyń janǵysh zattarmen oınaýyna jol bermeý kerek. Al eresekterge sirińke men óshirilmegen temekini tastamaǵan abzal.
