Qaraǵandyda temirjol bıletteri zańsyz satylǵan

QARAǴANDY. QazAqparat - Qaraǵandy oblysynda Qazaqstan Respýblıkasynyń memlekettik qyzmet isteri jáne sybaılas jemqorlyqqa qarsy is-qımyl agenttiginiń qyzmetkerleri «jasyryn satyp alýshy» ádisi boıynsha jolserikterdiń poıyzdardaǵy oryndarǵa bıletterdi zańsyz satý faktilerin jáne osy iste deldal bolǵandardy anyqtaǵan, dep habarlaıdy QazAqparat tilshisi.

Mekemede málim etkendeı,  kassalarda «Astana-Almaty» baǵytyna bıletter satylmaǵanymen,  poıyzdardyń ishinde bos oryndar bolǵan. Jolaýshylar poıyzǵa otyrý úshin aldymen deldaldarmen kelisýge májbúr bolǵan. Zańsyz ispen aınalysýshylar jolseriktermen sóz baılasyp, bıleti joq adamdarǵa poıyzdan bos oryndar alyp berip júrgen.

Osylaısha, «jasyryn satyp alýshy» «Astana «Nurly jol» - Almaty-2» poıyzymen Almatyǵa deıin 12 myń teńgege bıletsiz jetip alýǵa kelisken.

Budan bólek, tergeý barysynda jasyryn qyzmet kórsetetin adamdardyń áreketi jóninde temirjol vokzalynyń kúzet qyzmetkerleri de habardar bolǵany anyqtaldy. Kúzetshilerdiń ózi zańsyz iste deldarmen básekelesýge daıyn bolǵan.

Vedomstvoda málim etkendeı, dál osyndaı keleńsizdikter jolaýshylar men jolserikterdi qolaısyz jaǵdaıǵa ushyratyp otyr.