Qaraǵandyda «Táýelsizdik lentasy» aktsııasyn kóptegen ujymdar qoldady
QR Táýelsizdiginiń 30 jyldyǵyna arnalǵan bul shara Álııa Moldaǵulova atyndaǵy olımpıadalyq rezervtiń oblystyq mamandandyrylǵan mektep-kolledj-ınternatynda bastaldy. Sodan keıin estafetany basqa mádenı jáne bilim berý uıymdary qabyldady, dep habarlaıdy QazAqparat tilshisi.
«Táýelsizdik lentasy» óńir boıynsha saıahattaıdy. Kezdesýler tek oblys ortalyǵynda ǵana emes, Jańaarqa aýdanynyń Ospan Álibaı atyndaǵy mektebinde de ótti. Aktsııa «Qazaq jastary» klýbynyń demeýshiligimen jalǵasýda.
Kezdesýlerde aktsııa uıymdastyrýshylary uly qaıratkerler men olardyń táýelsizdikke qol jetkizýdegi sińirgen eńbekteri týraly áńgimeleıdi.
Qatysýshylarǵa Táýelsizdik lentalary taratylady.
Lentada tarıhı tulǵalar beınelengen: Móde qaǵan, Kereı men Jánibek handar, Abylaı han, Keńesary han, Álıhan Bókeıhan. Sondaı-aq tarıhı datalar kórinis tapqan. Budan basqa, qazirgi shekaradaǵy Qazaqstan Respýblıkasynyń kartasy menTúrik qaǵanatynyń baıraǵy beınelengen.
«Altyn adamnyń sımvoly qazaq tarıhynyń saq dáýirimen tyǵyz baılanysty ekenin bildiredi. Mańyzdy kezeńder: 552 jyl – Túrki qaǵanatynyń qurylýy; 1465
jyl – Qazaq handyǵynyń qurylýy; 1917 jyl – Alashorda úkimetiniń qurylýy; elimiz táýelsizdik alǵan 1991-jyl. Kitap pen shyǵystan shyǵyp kele jatqan kún Qazaqstannyń bolashaǵyn beıneleıdi. Lentamen kómkerilgen ulttyq oıý-órnek ulttyq mádenıet pen dástúrdi saqtaýǵa shaqyrady», – dep túsindirdi aktsııanyń bastamashylary.
Uıymdastyrýshylardyń aıtýynsha, aktsııa el Táýelsizdiginiń 30 jyldyǵymen tuspa-tus kelgen basqa da tarıhı kúnderge oraılastyrylǵan. Olar: Ekinshi Shyǵys-Túrik qaǵanatynyń negizin qalaýshylardyń biri Tonykóktiń týǵanyna 1375 jyl;
Shyǵys Túrik qaǵanatynyń bıleýshisi Bilge qaǵannyń týǵanyna 1340 jyl; Abylaı hannyń 310 jyldyǵy; Qazaq handyǵynyń qalpyna keltirilgenine 180 jyl; Álıhan
Bóheıhannyń 155 jyldyǵy; Álimhan Ermektiń 130 jyldyǵy jáne t. b.
«Táýelsizdik lentasy» – bul ulttyq qundylyqtardy nasıhattaýǵa baǵyttalǵan jobalardyń biri.
