Qaraǵandyda Táýelsizdiginiń 30 jyldyǵyna arnalǵan ashyq sabaqqa 3 myń oqýshy qatysty

QARAǴANDY. QazAqparat – Qaraǵandynyń Nazarbaev zııatkerlik mektebinde Qazaqstan Táýelsizdiginiń 30 jyldyǵyna arnalǵan «Jasampazdyq pen damýdyń 30 jyly» atty is-shara ótti. Ashyq sabaqqa tikeleı efırde oblystyń 95 jetekshi mektebiniń 3 myńǵa jýyq oqýshysy qatysty, dep habarlaıdy QazAqparat tilshisi.

Іs-shara bir mezgilde Qazaqstannyń barlyq NZM-de ótti. Onda eldiń táýelsizdigi, respýblıkanyń qalyptasýyndaǵy Tuńǵysh Prezıdenttiń róli, sondaı-aq memlekettiń sońǵy jyldardaǵy áleýmettik-ekonomıkalyq jetistikteri týraly aıtyldy.

Sondaı-aq, oqýshylar Táýelsiz Qazaqstannyń qurdasy - Zııatkerlik mektep muǵalimderiniń beıne suhbattaryn tyńdady. Solardyń biri – Qaraǵandy NZM hımııa pániniń muǵalimi Inabat Hamıtova. Qazir ol Amerıkada «Bolashaq» baǵdarlamasymen oqıdy.

«30 jyl ishinde biz túrli saladaǵy úlken ózgeristiń kýási boldyq. Olardyń ishinde bilim men ǵylymdy, Nazarbaev zııatkerlik mektepteri, Nazarbaev Ýnıversıteti, «Bolashaq» baǵdarlamasy sııaqty jobalardy bólip kórsetýge bolady. Qazir men «Bolashaq» baǵdarlamasymen Pensılvanııa ýnıversıtetinde hımııa magıstri dárejesin alamyn. Bul Qazaqstan táýelsizdiginiń arqasynda múmkin boldy», - deıdi Inabat Hamıtova.

Zııatkerlik mektep oqýshylary bilim men ǵylymnyń el damýynda úlken ról atqaratynyna senimdi.

«Bolashaqta men ıadrolyq fızıka salasynda maman bolyp, óz bilimimdi memleketimizdiń ıgiligine paıdalanǵym keledi», – deıdi Qaraǵandy NZM 12-synyp oqýshysy Nurasyl Jumabaev.

Ashyq sabaqqa Qaraǵandy oblysynyń jastar saıasaty máseleleri basqarmasynyń basshysy Birjan Álimjanov pen Bilim berýdi damytý oqý-ádistemelik ortalyǵynyń dırektory Baqytgúl Ábdikerova qatysty. Іs-shara sońynda qonaqtar oqýshylardy qyzyqtyrǵan suraqtarǵa jaýap berdi.