Qaraǵandyda táýelsiz baıqaýshylar EQYU mıssııasynyń ókilderimen kezdesti

QARAǴANDY. QazAqparat – Qaraǵandy oblysynyń Kásipodaq ortalyǵy janyndaǵy saılaýdy baqylaý jónindegi óńirlik shtabqa EQYU mıssııasynyń ókilderi Anke Kerle (Germanııa) jáne Krıstına Bogdanova (Reseı) keldi. Kezdesýge qatysýshylar saılaýǵa daıyndyq máselelerin talqylady, dep habarlaıdy QazAqparat tilshisi.

Áńgime barysynda baıqaýshylardy oqytýǵa jáne saılaý aldyndaǵy jumysqa qatysty máseleler qozǵaldy. Táýelsiz baıqaýshylardyń qyzmeti saılaý protsesiniń zańdylyǵyna, ashyqtyǵyna, erkindigi men adaldyǵyna baǵyttalǵany atap ótildi.

Kezdesýge Qaraǵandy oblysynyń Kásipodaq ortalyǵy janyndaǵy «Keleshek» jastar keńesiniń tóraıymy Aıjan Táýbebaeva, «Qazaqstan azamattary» qoǵamdyq birlestiginiń dırektory, partııalyq emes baıqaýshylar shtabynyń ókili Dmıtrıı Poltarenko qatysty.

Qazaqstanda 2021 jyldyń 10 qańtarynda Parlament Májilisi men barlyq deńgeıdegi máslıhat depýtattarynyń saılaýy ótedi. Qaraǵandy oblysynyń turǵyndary sailau09.kz saıtynda nemese Senim109 Biryńǵaı úılestirý ortalyǵyna qońyraý shalý arqyly saılaýshylar tiziminen ózderin teksere alady.