Qaraǵandyda Tatýlastyrý ortalyǵy ashyldy
QARAǴANDY. QazAqparat - Qaraǵandyda Kásipodaqtar úıinde Tatýlastyrý ortalyǵy ashyldy, ol medıatsııa negizinde jumys isteıtin bolady, dep habarlaıdy óńir basshysynyń resmı saıty.
Osyǵan deıin QR Joǵarǵy soty men Qazaqstannyń kásipodaqtar federatsııasy bitimgerlik is-áreketinde ózara áriptestik týraly memorandýmǵa qol qoıǵan bolatyn. Qazaqstanda medıatsııany damytý memlekettik saıasattyń mańyzdy bólikteriniń biri bolyp tabylady.
Tatýlastyrý ortalyǵy barlyq kúsh-jigerin daýdy sotqa deıin sheshý, shıelenisterdi, onyń ishinde eńbek salasyndaǵy shıelenisterdi sheshýge baǵyttaıtyn bolady. Oǵan qoǵam qaıratkeri jáne kásibı medıator Tatıana Savıtskaıa basshylyq etedi.
Ortalyqta otbasylyq jáne iskerlik áńgime qurýǵa arnalǵan bólmeler bar.
- Búginde oblysymyzdyń barlyq sottarynda sot medıatsııasy retinde tatýlastyrý protsedýralaryn ótkizýge arnalǵan kabınetter bar. Medıatsııa ortalyǵy Qaraǵandy qalasyndaǵy Dostyq úıinde qyzmet etedi. Aýdandyq jáne aýyldyq ákimdikterdiń janynda kásibı emes medıatorlardyń qatysýymen tatýlastyrý protsesterin ótkizýge arnalǵan 77 kabınet ashylǵan, - dep atap ótti Qaraǵandy oblystyq sotynyń azamattyq ister jónindegi sot alqasynyń tóraıymy Janna Seıdalına.
Respýblıkamyzdyń aýdandyq sottarynda azamattyq daýlardy qarastyrýda «Sottaǵy tatýlastyrý protsedýralary» pılottyq jobasy iske qosyldy. Oǵan Qaraǵandy oblystyq soty men Qaraǵandy qalasy Oktıabr aýdanynyń №3 aýdandyq soty qatysty.
Tatýlastyrý ortalyǵy Qaraǵandy qalasy, Álıhanov kóshesi 5, 202 kabınet mekenjaıy boıynsha ornalasqan.
Telefondar: 8 (7212) 41 31 34; 8 708 436 36 96.
Aıta keter jaıt, az qamtylǵan azamattar, múgedekter jáne zeınetkerler bul qyzmetterdi tegin paıdalana alady. Birqatar azamattar sanattary úshin jeńildikter qarastyrylǵan.
