Qaraǵandyda tanymal pablık balanyń ólimi týraly qaýeset taratyp jatyr

QARAǴANDY. QazAqparat - Polıtsııa qoǵamda dúrbeleń týǵyzatyn qaýeset taratqandar jaýapqa tartylatyny týraly eskertýde. Atap aıtqanda, skandal_krg.+ pablıgi Temirtaýdaǵy orta mekteptiń janynan tabylǵan 10 jasar balanyń ólimi týraly jalǵan aqparat taratqan, dep habarlaıdy «QazAqparat» HAA tilshisi.

Tabylǵan deneniń 10 jasar balaǵa tıesili emestigi jáne onyń adam óltirý faktisi emes ekendigi anyqtaldy. Mekteptiń janynda óli dene jatqan sýret jarııalanǵan post óńirde dúrbeleń týǵyzdy. Avtor bylaı dep jazady: «Taıaýda №2 mekteptiń janynan 10 jasar balanyń denesi tabylǵan deıdi. Ata-analar, abaı bolyńyzdar».

Óńirde belgisiz bireýdiń balalardy óltirip júrgeni týraly sybys taraǵan. ІІD baspasóz qyzmeti bul aqparatty joqqa shyǵardy.

«Úsh kún buryn, 16 qyrkúıekte, 1969 jylǵy er adamnyń denesi tabyldy. Onyń jasy onda emes. Bul jalǵan aqparat jáne bul adam óltirý isi emes. Saraptama kórsetkendeı, bul adamnyń aǵzasy qatty tońyp, sonyń saldarynan qaıtys bolǵan. Er adamnyń jeke basy anyqtaldy», - dep habarlady Qaraǵandy oblystyq ІІD baspasóz qyzmetiniń basshysy Baqytjan Qudııarov.

Polıtsııa qaýesetterdi taratqan adamnyń qylmystyq jaýapqa tartylatynyn eskertti.