Qaraǵandyda taksı júrgizýshisine shabýyl jasaldy
QARAǴANDY. QazAqparat - Qaraǵandy polıtseıleri taksı júrgizýshisine pyshaqpen shabýyl jasaǵan Ózbekstannyń eki azamatyn izin sýytpaı ustady, dep habarlaıdy QazAqparat tilshisi.
«Polıtsııaǵa qaladaǵy iri taksı fırmalarynyń birinde jumys isteıtin júrgizýshi shaǵym túsirdi. Ol qaladaǵy dámhanalardyń birinen shyqqan eki jolaýshynyń pyshaqpen shabýyl jasap, qorqytý arqyly qymbat telefonyn ıemdengenin, keıin qashyp ketkenin habarlady», - dep málim etti oblystyq ІІD-de.
Qaraqshylardy oqıǵa bolǵan tusqa jaqyn jerden ustaǵan. Tártip saqshylary sıpattamaǵa sáıkes keletin eki er adamdy baıqap qalǵan. Eki kúdikti de ustaldy. Ustalýshylardan urlanǵan telefon da tabylǵan.
Vedomstvoda túsindirgendeı, ustalýshylardyń ekeýi de Ózbekstan azamattary. Olar 2017 jyldan beri Qaraǵandyda turyp kelgen. Olar ustalǵan kezde mas kúıde bolǵan.
Atalmysh fakti boıynsha QR QK 192-baby 2-bóligi boıynsha sotqa deıingi tergeý jumystary júrip jatyr. Ustalýshylar ýaqytsha ustaý ızolıatoryna qamaldy.
