Qaraǵandyda taksı júrgizýshisin óltirgen stýdentter uzaq merzimge sottaldy

Búgin shyǵarylǵan úkimge sáıkes, Madııar Tústikbaev, Dıas Túmestaev pen Saǵyn Yqylas aıypty dep tanyldy.

Olar mas kúıinde taksıge otyrǵan. Jolda taksı júrgizýshisi kelesi móltekaýdanǵa jetkenge deıin jol aqysyn tóleýdi suraǵan. Osyǵan baılanysty taksı júrgizýshisi Saıat Soltanbekov pen sottalýshy Yqylastyń arasynda janjal týǵan. Sottalýshy ashýǵa býlyǵyp, ózimen birge alyp júrgen as pyshaǵymen júrgizýshiniń ıyǵy men moınynan pyshaqtaıdy. Ol júrgizýshiniń artynda otyrǵan.

 

Qaza tapqan júrgizýshini oryndyǵynan túsirip tastap, Mersedes kóliginiń tizginine sottalýshylardyń biri otyrady. Kóliktiń terezesinen júrgizýshiniń eki uıaly telefony men pyshaqty laqtyryp jiberedi. Keıin Respýblıka dańǵylynda ornalasqan turǵyn úıdiń aýlasyna kelip, kóliktiń ústindegi taksıge tıesili «9 regıon» belgisin jáne memlekettik nómirin alyp tastaıdy. Dálelderdi artqy oryndyqqa laqtyrady. Qujattardy órteıdi. Sodan soń Buqar jyraý aýdany Botaqara kentine jol tartady. Aýyldyń mańyndaǵy dalaǵa kólikti qaldyryp, ylǵaldy maılyqtarmen rýldegi saýsaq izderin óshiredi. Taksı júrgizýshisiniń máıitin joldan ótip bara jatqan júrgizýshiler tapqan.

Polıtseıler stýdentterdi anyqtady. Kúdiktiler mashınada saýsaq izderi bolmaǵandyǵyn aıtyp, qylmystaryn jaltarady. Alaıda, polıtsııa qyzmetkerleri basqa da aıǵaqtardy tapqan.

Qaraǵandy oblystyq qylmysyq is boıynsha mamandandyrylǵan aýdanaralyq sotynyń sýdıasy Islamhan Esenbaev aıyptalýshylardyń birin QR QK 99-baby «adam óltirý» boıynsha kináli dep taýyp, 19 jylǵa bas bostandyǵynan aıyrdy.

 

Qalǵan ekeýin avtomobıldi ıemdengeni jáne resmı qujattardy joıǵany úshin QR QK 200-baby men 384-baby boıynsha úsh jylǵa sottady. Al adam óltirý isi boıynsha aqtalyp shyqty, sebebi oqıǵalyq saraptama olardyń adam óltirýge qatysy joqtyǵyn dáleldedi.

Sot zardap shekken taraptyń azamattyq shaǵymyn qanaǵattandyryp, sottalýshylardy 2 mıllıon teńge ótemaqy tóleýlerine mindettedi.