Qaraǵandyda taksı qarttar men kópbalaly otbasy múshelerin tegin tasıdy

QARAǴANDY. QazAqparat – Qaraǵandy oblysynda volonterler jylyna oraı jańa áleýmettik jobalar iske qosylady, dep habarlaıdy QazAqparat.

Volonterler tarıhı eskertkishterdi retke keltirip, balalar alańdaryn jóndeıtin bolady. Ardagerlerge, jalǵyz basty qarııalarǵa jáne kóp balaly otbasylarǵa arnalǵan tegin taksı paıda bolady.

«Saryarqa jastary» oblystyq volonterlik shtabynda óńir basshysy Jeńis Qasymbekpen bolǵan kezdesýde belsendiler oblystaǵy eriktiler jyly qandaı ıgi isterge toly bolatynyn talqylady.
Oblystyń barlyq qalalary men aýdandarynda eriktilerdi qoldaý ortalyqtary ashylýda. Mindet – eriktiler qozǵalysyna barynsha kóp adamdardy tartý. «Asyl mura» jobasy aıasynda eriktiler tarıh jáne mádenıet eskertkishterin qalpyna keltirýge kómektesetin bolady. Taǵy bir aýqymdy joba – «Meıirim» jobasy, onyń maqsaty – balalar úıiniń tárbıelenýshilerine qoǵamdaǵy beıimdelýge, bolashaq mamandyǵyn tańdaýǵa kómek kórsetý. Volonterlik uıymdar «SJ» aktsııasyn iske qosady, - dedi Qaraǵandy oblysynyń jastar saıasaty máseleleri jónindegi basqarmasynyń basshysy Nurjan Jetpisbaev.
Ol eriktilerdiń jyl uranyn eske saldy: «Biz birgemiz». Barlyq volonterlik jobalar jeti baǵytqa biriktirildi.

Nurjan Jetpisbaev «Tegin taksı» jobasyn usyndy. Onyń aıtýynsha, atalmysh sharaǵa qatysýǵa birneshe taksoparkter kelisim bergen. Volonterler shtab quryp, qala boıynsha júrip-turýy qıyn adamdardan ótinishter qabyldaıtyn bolady. Uly Otan soǵysynyń ardagerleri men tyl eńbekkerleri, jalǵyz basty qart adamdar, sondaı-aq kóp balaly otbasylar tegin kólikterdi paıdalana alady.

Kezdesýge ár jastaǵy eriktiler jınaldy. 55 jas aralyǵyndaǵy «kúmis» eriktiler bolyp tabylatyn aǵa býyn ókilderi ózderiniń jetistikterimen jáne josparlarymen bólisti.

«Kóbi eriktiler – jastardyń isi dep sanaıdy. Bul múldem durys emes. Egde jastaǵy adamdar qoǵamǵa paıda ákelýdi jalǵastyrýǵa, óz bilimi men tájirıbesimen bólisýge daıyn. Bizdiń uıym «Shańyraq» volonterlik ortalyǵymen yntymaqtasady. Onyń kómegimen Máskeýge «kúmis» volonterler forýmyna baryp qaıtty», - dep atap ótti Temirtaý ardagerler keńesiniń tóraǵasy Birlikbaı Ordabaev.

Oblys ákimi eriktiler qozǵalysyn keńeıtip, jańa azamattyq bastamalardy usynýǵa shaqyrdy.
«Memleket basshysy aıtqandaı, eriktiler senbiliktermen jáne bir jolǵy chellendjdermen shektelmeıdi. Eriktilik – bul patrıotızmniń joǵary kórinisi. Altrýızm – ómirlik qaǵıdattardyń biri. Jáne ıgi isterde júıesizdik bolmaýy tıis. Biz bárimiz birge ómirimizdi jaqsartamyz», - dep atap ótti Jeńis Qasymbek.

Óńir basshysy eriktilerdiń oblystyq is-sharalar josparyn júzege asyrý jóninde tapsyrma berdi. Volonterlerge kómek retinde aımaqtyq resýrstyq ortalyq ashylady, sheberlik sabaqtary, trenıngter men oqytý semınarlaryn uıymdastyrady.