Qaraǵandyda taǵy bir pýlmoprovızorlyq gospıtal ashyldy
QARAǴANDY. QazAqparat - Qaraǵandyda aýyr naýqastarǵa arnalǵan oryndar kóbeıedi. Oblystyq klınıkalyq aýrýhana bazasynda 350 tósektik pýlmoprovızorlyq gospıtal ashyldy, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbek medıtsınalyq mekemeniń patsıentterdi qabyldaýǵa qanshalyqty daıyn ekendigimen tanysty.
Gospıtalda 100 tósek juqpaly, 250 tósek - pýlmoprovızorly bolady. Mekemede ÓJJ apparattarymen, patsıent monıtorlarymen jáne perfýzorlarmen jabdyqtalǵan jansaqtaý bólimi bar.
Epıdemıologııalyq qaýipsizdik maqsatynda barlyq úı-jaılar oqshaýlanyp, beınebaqylaý júıesimen jabdyqtalǵan.
Ǵımarattyń ishinde kompıýterlik tomograf ornatylǵan, al ekinshi apparat munda jaqynda qoıylady.
Gospıtalda COVID-19 bar naýqastardy, sondaı-aq túrli bronho-ókpe aýrýlarynan zardap shegetinderdi de qabyldaıtyn bolady.
«Endi bizde juqpaly aýrýlar bólimshesi ashylǵannan soń, KVI-men aýyratyn naýqastardy ınfektsııalyq gospıtaldarǵa jiberýdiń qajeti bolmaıdy. Patsıent kelip túskende, biz qannyń ottegimen qanyǵý deńgeıin - satýratsııasyn tekseremiz. Eger ol jaqsy bolsa, kompıýterlik tomografııa jasaımyz. Qajet bolǵan jaǵdaıda naýqasty pýlmoprovoızorlyq bólimshege ornalastyramyz. Osy kezeńde biz koronavırýstyq ınfektsııaǵa PTR-test alamyz. Eger ol oń nátıje berse, naýqasty juqpaly aýrýlar bólimine aýystyramyz», - dep túsindirdi pýlmoprovızorlyq gospıtal basshysy Lázzat Sholanova.
Bir aýysymda 20 dáriger, 30 medbıke men sanıtar jumys isteıdi. Sondaı-aq, kómekke áskerı dárigerler de keldi. Olar juqpaly aýrýlar bólimine jetekshilik etetin bolady.
Jaqynda ǵımaratta kúrdeli jóndeý jumystary aıaqtaldy. Munda qaıta jobalaý júrgizilip, gospıtal zamanaýı jeldetý júıesimen jabdyqtaldy.
