Qaraǵandyda súttegi túıneme vırýsy jaıly jalǵan aqparat taratýshyny taýyp bergen adamǵa 1 mıllıon teńge tóledi
QARAǴANDY. QazAqparat - Qaraǵandyda áleýmettik jelilerge taraǵan «Nátıje» kompanııasy sútindegi túıneme vırýsy jaıly jalǵan aqparat isin ashýǵa 1 mıllıon teńge syıaqy kómektesti. Bul jaıynda kompanııa basshysy Erlan Áshim habarlady.
«Bizdiń kompanııa qyzmetkerleri «Nátıje» ónimindegi túıneme jaıly jalǵan aqparat týraly polıtsııaǵa shaǵym túsirdi. Polıtsııa bul iske shyndap kiristi, iz kesýge sál-aq qalǵan edi», - dedi E.Áshim. - Biraq bizdiń marketologtar jalǵan aqparat taratýshyny tapqan adamǵa 1 mıllıon teńge syıaqy taǵaıyndaýdy usyndy. Men ruqsat berdim. Habarlandyrý jarııalanysymen, mol aqparatqa ıe boldyq. Osy aqparattyń arqasynda, qańqý sózdi shyǵarǵan adamdy taptyq».
Onyń aıtýynsha, habarlaýshyǵa ýáde etilgen soma tólendi.
Kompanııa basshysy jalǵan aqparat taratýshymen kezdesip, keshirgenin, tatýlasqanyn jetkizdi.
Kúdikti Anastasııa Şelýpanova da baspasóz konferentsııasyna qatysty.
«Men bul habarlamany alty adamnan turatyn WhatsApp tobyna jiberdim. Dúkendegi túıneme jaıly sóılesip otyrǵanbyz. «Nátıjeniń» túıneme oshaǵy bop tabylǵan Shet aýdanynan sút alatynyn oqyp, aýdıohabarlama jiberdim. Bul jaı ǵana óz aramyzda qalady dep oılaǵanmyn, biraq ǵalamtorǵa lezde tarap, óz daýysymdy ǵalamtordan estidim. Qoryqqanymnan búkil habarlamany óshirip, nómirimdi buǵattap tastadym».
Ol kópshilik aldynda kompanııadan keshirim surady. «Men qazir óz aqymaqtyǵym úshin jaýapkershilikti moınyma alyp turmyn, - dep málimdedi Anastasııa. - Kompanııa basshylyǵynan ǵana emes, barlyq qyzmetkerler men ónimdi tutynýshylardan keshirim suraımyn».
Qyzdyń aıtýynsha, 1 mıllıondy alǵan er adam onyń tanysy. «Men jaıly kimniń habarlaǵanyn bilemin. Ár adam óz mıllıonyn túrli jolmen tabady», - dedi A. Şelýpanova.
Anastasııanyń advokaty Qanat Maqyjanov sotqa deıingi tergeý júrgizilip jatqanyn aıtty. Onyń qorǵaýyndaǵy qyz kepildikpen bosatylǵan.
Kompanııa ókilderiniń habarlaýynsha, jalǵan aqparatshyny izdeý úshin 1,5 mıllıon teńge shyǵyn kelgen. «Tikeleı shyǵyn - 1 mıllıon 480 myń teńge. Bul somaǵa syıaqy jáne BAQ-qa habarlandyrý berý sekildi janama shyǵyndar kiredi. Satylym boıynsha shyǵyndy esepteý qıyn. Qatty kúıreýge ushyraǵan joqpyz. Biraq, moraldi túrde zardap shektik», - dep atap ótti E.Áshim.
Onyń aıtýynsha, «kompanııa shyǵyn óteýdi talap etpeıdi». Aýdıojazba jóninde ǵana kelisimge kelgenin, SMS týraly isti sońyna deıin jetkizetinin aıtty.
Eske sala keteıik, Qaraǵandy oblysy, Shet aýdany, Erkindik aýylynda túıneme aýrýynyń shyǵýy anyqtaldy. Aýyl turǵyny aýrý sıyrdy soıyp, onyń etin jaqyndary men kórshilerine taratyp bergen.
Oblystyq juqpaly aýrýlar aýrýhanasyna túıneme aýrýy bolýy múmkin 11 adam jatqyzyldy. Zerthanalyq jumystar 8 adamnyń aýrýyn anyqtady. Eki adam - 33 jastaǵy áıel men 49 jastaǵy er adam qaıtys boldy.
TJ jóninde QR QK 327 baby - «Veterınarııalyq qaǵıdalardy nemese ósimdik aýrýlary men zııankesterine qarsy kúresý úshin belgilengen qaǵıdalardy buzý» jáne QR QK 317 baby - «Medıtsına nemese farmatsevtıka jumyskeriniń kásiptik mindetterin tıisinshe oryndamaýy» boıynsha eki qylmystyq is qozǵaldy. Sotqa deıingi tergeý amaldary júrgizilýde.
QR Premer-Mınıstri Kárim Másimov Qaraǵandy oblysyna jumys sapary barysynda, aımaqtaǵy tótenshe jaǵdaıǵa qatysty jınalys ótkizdi. Úkimet basshysy aýyl sharýashylyǵy, densaýlyq saqtaý jáne áleýmettik damý mınıstrlikterine, Qaraǵandy oblysynyń basshylyǵyna birqatar tapsyrmalar berdi.
