Qaraǵandyda sýaǵarlar men aryqtar tazartyla bastady
ASTANA. QazAqparat - Qaraǵandy qalasynyń jeke sektorlarynda sýaǵar qubyrlary men jyralar qardan tazartylýda. Osylaısha kommýnaldyq qyzmet sý tasqynynyń aldyn alyp jatyr, dep habarlaıdy oblystyq ákimdiktiń baspasóz qyzmeti.
Bıyl bul jumysqa "Tazalyq Ekspert" kompanııasy jaýap beredi. Aqpan aıynda Moskovskaıa, Zelınskıı, Maılın, Bıblıotechnaıa, Sovhoznaıa, Serov, Sotsıalıstıcheskaıa, Roza Lıýksembýrg, Lıza Chaıkına jáne taǵy basqa kósheleri - barlyǵy 5312, 3 tekshe metr qardan tazartyldy. Sondaı-aq, Chkalov, Badın, Popov, Medıtsınskaıa, Zavodskaıa kóshelerindegi 452 sýaǵar qubyry arshyldy.
Tazalanatyn aryqtar men qubyrlardy "Tazalyq Ekspert" kompanııasynyń mamandary tańdaıdy. Olar túsken qardyń mólsheri men asfalt jamylǵysynyń bolýyna nazar aýdarady.
"Qazgıdromet" boljamy boıynsha jaqyn kúnderi respýblıkanyń barlyq aýmaǵynda aýa temperatýrasy joǵarylaıdy dep kútilýde.
