Qaraǵandyda sý tasqynynda joǵalǵan ekinshi jigittiń denesi tabyldy
QARAǴANDY. QazAqparat - Búgin, 7 sáýir kúni tańǵy 10-da Qaraǵandy oblysy Tótenshe jaǵdaı departamentiniń jedel-qutqarý jasaǵy jáne ІІM Ulttyq gvardııasynyń №52859 áskerı bóliminiń sarbazdary 2 sáýir kúni Qarqaraly aýdanyndaǵy Qopa ózeninde sýǵa ketken ekinshi jigittiń denesin tapty, dep habarlaıdy «QazAqparat» HAA tilshisi.
«Máıit tabylǵan jerge jetý ońaı bolmady, qutqarýshylarǵa muzdy jarýǵa týra keldi. Altynshy sáýir kúni keshke muz jarý jumystarynan keıin 1980 jyly týǵan er adamnyń denesi tabyldy. Búgin tańerteń saǵat 10-da 1977 jylǵy aǵasynyń denesin tapqan. Sý aǵyny olardy ózenge qulaǵan jerden 2-2,5 shaqyrym qashyqtyqqa deıin aǵyzyp áketken», - dep habarlady Qaraǵandy oblysy TJ departamenti baspasóz qyzmetiniń jetekshisi Qýanysh Mutallapov.
Eske sala keteıik, 2 sáýir kúni eki aǵaıyndy Qaraǵandy oblysy Qarqaraly aýdany Nurken aýylynyń mańynda jaıylyp júrgen malyn izdep shyǵyp, sodan iz-túzsiz joǵalyp ketken edi.
