Qaraǵandyda sý tasqyny kezinde adamdar men maldar evakýatsııalanatyn jerler belgilendi
ASTANA. QazAqparat - Qaraǵandy oblysynyń bıligi bıyl kóktemde bolýy múmkin sý tasqyny kezinde adamdar men maldar evakýatsııalanatyn qaýipsiz jerlerdi belgiledi. Bul týraly aımaq ákimdiginiń resmı saıtynda málim etildi, dep habarlaıdy QazAqparat.
«Tótenshe oqıǵalar úshin jáne turǵyndardy evakýatsııalaý qajet bolǵan jaǵdaıda 78 ýaqytsha ornalasý beketteri anyqtalyp, úı janýarlaryn ýaqytsha aıdaý oryndary bekitildi», - delingen habarlamada.
Qaraǵandy qalasynyń aýmaǵyn kóktemgi tasqynnan qorǵaý úshin sondaı-aq Fedorov sý qoımasynyń mańaıyndaǵy Soqyr ózeniniń arnasyn tazartý josparlanyp otyr.
Tazartýdy talap etetin Soqyr ózeni arnasynyń uzyndyǵy 5400 metrdi quraıdy. Qaraǵandy oblysynyń Tabıǵı resýrstar jáne tabıǵatty paıdalanýdy retteý basqarmasy tazartý jumystarynyń jobasyn jasady.
Sonymen qatar josparda sý jınaý toǵanynan bastap (Kógildir toǵan ózeni) Ýnıversıtet kóshesine deıin (Fedorov sý qoımasynyń aýmaǵy) nóserlik kollektor salý bar. Joba qujattardy ázirleý kezeńinde.
Kópjyldyq baqylaýlarǵa negizdele otyryp, Qaraǵandyda kóktemgi sý tasqyny kezinde qaýipti sanalatyn 19 jer anyqtaldy. Olardyń 10-y Qazybek bı atyndaǵy aýdanda ornalasqan, 9 - Oktıabr aýdanynda.
Osy aptada «Blagoýstroıstvo» KMM qyzmetkerleri nóserli aryqtardy jáne Kontorskıı tuıyq kóshesindegi, Badına, Qurmanǵazy, Raıonnaıa, Aıvazovskıı kósheleriniń boıyndaǵy nóser qabyldaǵyshtardy tazartýdy bastady.
TJ boıynsha basqarma ótken jyldyń kúzinde Kompaneısk kentindegi (Suryptaý) sý jınaý aryǵyn tazartýdy uıymdastyrǵan bolatyn. Sonymen qatar aldyn ala Soqyr ózeni arnasynyń boıymen (musylman mazarlarynan bastap Almaty-Ekaterınbýg respýblıkalyq mańyzy bar avtojolyna deıin) bir shaqyrym qashyqtyqqa ýaqytsha jer úıindisi jasaldy.
