Qaraǵandyda sý shaıyp ketken áýejaı jolyn qalpyna keltirýge 8 mln teńge jumsaldy (FOTO)
QARAǴANDY. QazAqparat - Qaraǵandyda sý shaıyp ketken áýejaı joly ashyldy. Ony qalpyna keltirý úshin 8 mln teńge qarajat jumsaldy. Bul týraly Qaraǵandy qalasy ákiminiń orynbasary Arman Jumekenov habarlady.
«Shaıylǵan jol ýchaskesin qalpyna keltirý sharalary qabyldandy. Jol tutastaı qaıta jóndeldi deýge bolady. 150 tonna asfalt, 120 tonna iri qıyrshyq tas, usaq tas, sonsha jamylǵy tóseldi», - dedi jýrnalısterge bergen suhbatyna A.Jumekenov.
Onyń aıtýynsha, jumys 8 kúnde jedel júrgizildi. «8 mln teńge aqsha ketti, jóndeý jumystaryna bıýdjetten tys qarajat jumsaldy. Biz jol uıymdaryn tarttyq, - dep atap ótti ákim orynbasary. -Ózderińiz bilesizder, Qaraǵandy qalasynyń aýmaǵynda TJ jarııalanǵan joq, sondyqtan tótenshe qordyń qarajatyn paıdalana almaımyz, bul taza bıznestiń áleýmettik jaýapkershiligi». Ol sý tolyqtaı toqtaǵanda, «Qazaqavtojol» konýs plıtalardy qalpyna keltirip, jol jıegin nyǵaıtyp, jol belgileri qoıylatynyn atap ótti. «Qazir qıraǵan jol ashyldy. Qaýipsizdik qamtamasyz etildi. Bizdiń qalalyq áýejaıǵa aınalma jolmen emes, tikeleı barýǵa bolady», - dep sózin túıindedi ol. Budan buryn habarlanǵandaı, 10-11 sáýirde Soqyr ózeniniń arnasynan tasyǵan sý qaraǵandylyq «Saryarqa» áýejaıynyń jolyn basty. Jol qozǵalysy shektelip, áýejaıǵa aınalma jolmen shyǵýǵa týra keldi. Qaraǵandy oblysy ákimdiginiń aqparatyna súıensek, óńirde sý tasqyny kezeńinde jergilikti mańyzy bar 17 shaqyrym joldy sý shaıdy. Budan basqa, 84 sý ótkizý qubyrlary men 12 kópir qırady. Jol uzyndyǵy 9 343 shaqyrymdy qurady.
